讀書是，以手指月而月不在指。

今天且讓我表現得正經一點，談一談「讀書」這回事。突然咁有興致扮正經，是因為一本書。

職業無分貴賤，知識也一様
這本《獨學術》，幾星期前某個深夜已經被我KO了。
我大概用了兩粒半鐘睇完。睇咁快，是因為當晚實在有點眼瞓，又不想等到第二日才把未睇部分睇埋，惟有不斷加速。通常能夠叫我咁快睇完的書，都是些娛樂性或追看性極高的讀物，而不是這麼一本教人怎樣去「讀書」的書——過去甚至從來都不會去睇這一類教人點點點的書，那些甚麼心靈西湯、誰撻咗我的乳酪、窮爹爹富爹爹，更加敬而遠之。
睇《獨學術》，同個人心態有關。活到這一把年紀，唔算好老但又絕對不後生；讀咗一定年月的書，累積了一堆（好似有用但又唔見好用得著的）知識，竟然開始感到：自己好多嘢都唔識。像睇推理，持續地睇咗十年嘞，點解仲有咁多勁嘢未睇？好似睇血殺片，以前都睇咗好多啦，點知——唉……
你或者認為上述的都．不．是．正．規．的．知．識——我反對。
不是在lecture hall或課室拎住本教科書來教的，才是知識。
咁講吧。不同年代血殺片的共同呈現，就是慘不忍睹的血肉模糊。但當穿透了那一層層模糊的血肉，是甚麼原因引致片裡的鹹濕仔鹹濕妹必死？貞潔的又必然不死？這會否因為觀眾以後生仔女為主，宅心仁厚的創作人才嘗試（這麼偏門地）教化佢哋？而第一部充份貫注這種（偽）教育意識的血殺片又係邊齣？對於以上種種的歷史考察，就是一門知識的產生。
當然，香港冇一個僱主見工時會去考你以上問題。

睇艱深的書，就像溝最難溝的女
《獨學術》作者，是白取春彥。最「顯赫」的著作便是那部足以令尼采癲多次的《超譯尼采》。
白取春彥提取了尼采著作中的片言隻語進行超譯——根本就不是譯，而是硬把自己想講的，屈係尼采所講。於是《超譯尼采》所呈現的尼采，好有活力好friendly，friendly到好似成日叫你加油咁。
至於這本《獨學術》，我唔敢話全本啱晒，但又的確有閱讀價值。獨學，在白取春彥觀念裡不是匿埋自閉地學習，而是不師從（死守）某個特定的老師（著作、學說）——應該搵多幾個老師（白取春彥強調搵的老師睇的書必需是最勁的，這一點我有保留）。
獨學要做的，是study而不是齋learn，只有study才可以令你發展出個人創見。
對於study白取春彥還提出了一些細則，有啲OK有啲OK好笑。
1.對於知識，不要單看表面，應該去挖掘知識產生的起源。追本溯源，才能令你看清知識的全面。以我為例，我咪學緊打鼓，有堂無端端問阿sir，是誰發明那一段好多歌都會採用的rhythm，一問，才知道當代流行音樂的形成，同黑奴被帶到美洲這歷史有著密不可分的關係。
2.資訊不等同知識。現在連搭巴士搭地鐵都會（被迫）睇到資訊，但睇完，其實等於冇睇——你只是「知道」一樣嘢，而不是「明白」一樣嘢。像你知道路姆西好hit，但路姆西在某層面象徵了甚麼？
點解會產生這麼一個象徵？
3.閱讀場所不重要。你不需要為自己先豪裝一間美侖美奐採光完美的書房，任何地方，甚至廁所，也可以是讀書場所。實不相瞞，我擁有長時間大住便睇書的良好習慣。在釋放了體內某些勞什子的同時，頭腦往往也是最澄明的moment。當然，肚疴或急到瀨時另計。
4.不要怕或避睇艱深的書。買了一本深嘢，不要懶神聖咁供奉喺書櫃，大可先丟埋一邊，令這本書原先俾你的神聖感減淡，然後懶不屑地，揭佢幾頁，睇吓個尾，慢慢就會覺得本嘢其實唔太深啫。他用了一個比喻去說明，就像越級挑戰溝一個高竇女，不要先被佢個勢拋窒——或許現實中的我總是被高竇女拋窒，這方法對我不管用，我依然挑戰不了艱深的書。
5.與其睇人家二手闡述，不如直接睇原著——所以根本不用嘥時間睇《超譯尼采》，直接睇尼采吧。對付這本《獨學術》態度也一樣，睇完，只代表睇咗一堆讀書的方法論。以手指月，而月不在指。
當然，如果你覺得自己已經好似阿叻咁叻，大可skip本文。