《我的嘥時間簡史（2013年版）》

因為讀者提醒，才驚覺這原來是2013年最後一篇了。這一嘢提醒，令我不期然對「時間」感觸起來。

再給我一點時間，重新去定義時間
 2012年除夕，我慣例地又為自己訂定來年目標，而目標通常不離以下兩項：
1.中一次完美的六合彩。所謂完美的六合彩，不是幾百萬那種，而是超級金多寶——結果，今年連七獎都未中過。
2.減去40磅的月巴——結果，好似反升了幾磅，shit。
而我從來都冇定以下一種目標：更充分而有效率地使用「時間」。
我們都有過一種錯覺：時間，唔使錢，任使唔嬲。
所以，講堅，童年時的我真的試過很真實地靜待時間過去——晨早做完不得不做的功課，溫書又冇心機，而距離我至愛的《忍者小靈精》播映時間尚有大嗱嗱半粒鐘，而當時又不像現在般可以玩電話或上網……
咁點好？我作出了一個大膽的無聊決定——企喺長木凳上（當年不是每個家庭都會添置梳化），以便我夠高望實掛在牆上的鐘，定睛望實秒針在眼前不斷走，同時苦等分針快點移到去「30分」位置。
現在看，這個舉動其實頗有哲學味，但在大人眼中只會覺得我癲咗，或在嘥時間（的而且確係），結果，自然是被籐條侍候。
我同時發現，等待30分鐘的流逝固然難捱，但原來要捱過那短短30秒的籐條酷刑，一樣咁難捱。
30分鐘 / 30秒這兩個明顯差好遠的時間長度，點解會令我產生一樣咁難捱的感受？
但因為太痛，痛楚令我未有就這問題繼續推理落去。

時間是熟睡的臉，說著夢的語言
 既然時間咁深奧難明，為了認識時間明白時間，我睇書，睇一些好深奧的書。
《存在與時間》——如果話我明白了海德格講乜，是完全呃你的。
《時間簡史》——那一個「簡」字並不代表「簡單」，沒有物理底的我睇咗四分一便放棄（當時又未有《獨學術》一書，教我怎樣去對待和克服深書）。
在對時間不明不白的情況下，繼續以過日辰心態對待時間。
直至有一天，我在某大型連鎖電器店撞見一個童年時的鄰居。
原來他在電器店工作，而我咁啱趕住去做嘢，需要買新的錄音筆。時間太匆匆，講不到甚麼深入話題，只是嗲了幾句，互問了對方和屋企人近況，便byebye。
我與他，都在三十年前跟隨家人搬入沙田一個新起好的屋邨。而在很多年後，我與他，都先後搬走了。搬走後，沒有再聯絡。
那一夜，瞓覺發夢時竟然見到童年時的佢（但我不知道夢中的自己，是而家咁樣定後生個様）。
在夢裡，我們一齊落商場快餐佔食早餐，去7仔食下午茶，再到商場文具舖（齋）睇模型；夏天時到源禾路的公共游泳池游水，更一齊學識游水，再一齊到游池小食部怒食慶祝；冬天時我去佢屋企打邊邊後打《魂斗羅》，又或佢嚟我屋企打邊邊後打《沙羅曼蛇》……
然後，急尿，紮醒。解決後我望住鏡，鏡裡是一個頭髮尚算濃密髮線也沒有後移，但已經大把白髮的自己。我看到了「時間」。

我開始用一些客觀事件去體認時間
 例1，回歸過後16年才有所謂政改三人組去聽我們對普選的意見。16年——在我成長的年代，即是一個人由出世到准許出入成年人機舖，所需要捱過的法定時間。諗番，都覺得相當難捱。
例2，終審法院裁定，居港未滿7年可領綜緩。7年——即是我當年由中一捱到預科畢業的時間。而未滿7年可領綜緩，感覺像讀完form 1便可以申請大學grant loan——但grant loan要還，綜緩唔使。
人生是一場時間的工夫。如果努力工作和生活是在正常地動用時間，居港未滿7年可領綜緩就是在壓縮時間，他們的時間，明顯比起住夠七年有凸都冇領綜援的你我他，更efficiency。
在臨近交稅的這一刻我好嬲，嬲自己過去一直在腳踏實地嘥時間。我認為我終於明白活在當下的意思。
（原文刊於am730）