2013年11月1日星期五

浪漫月巴睇舊戲(五十):不型的視帝,遇上恐怖雞


















係老友都知我是黎耀祥fans——但主要是榮登視帝前的那個黎耀祥。
我自然不會知道黎耀祥本人有冇變,只是自從(接二連三地)做了視帝後,TBB安排給他的角色,即使職業個性不同,但都離不開一個字,型。演員一旦被要求keep住有型,就會定型。

視帝那完全不型的電影年代

以前看過《戲劇浮生:黎耀祥論演技與人生》,當中輯錄的那part超長訪問,絕對是我近年看過最好睇的香港演員訪問,沒有無聊八卦,也沒有執筆者的主觀臆測推斷,訪問所呈現的就是一個演員怎樣磨練自己、怎樣審視自己的工作/專業。而最有印象是黎耀祥提到,自己比較喜歡電視台工作模式,對電影就有所保留亦不太眷戀。
基於已經好多年冇開電視(不為響應任何運動,只是好耐以前已覺冇嘢好睇),我對黎耀祥的認識主要來自電影。電影裡的他,職業個性儘管不同,但有一個共同點:完.全.不.型。
他在電影年代負責演的離不開小人物,有躝癱有廢柴,有失業的Killer也有hea做的Taxi Driver。
無奈,黎耀祥接拍的電影不是低成本製作就是超低成本製作,配合上那年頭接近死亡的電影市況,根本冇乜人咁神心願意入場看他的用心演出。
例如《恐怖雞》。1998年的電影,黎耀祥罕有地做第一男主角。但我們的視帝,有成大半齣戲都是被膠紙綁住喺輪椅度,禁錮在一間村屋裡,相當慘——因為戲的主體由始至終都是那恐怖的「雞」,吳倩蓮。
睇完嗰刻我深信,如果把故事寫成小說,絕對是一個懸疑到爆的推理。

在2013年才終於看到寒意
一開始,便交代了大陸女子吳倩蓮一連串唔知點解的奇怪行動——把一個將要落香港同老公團聚的深圳妓女勒死,再扮成「佢」,以「佢」的身份來到香港,攞埋身份證。然後,再狂搵「佢」曾經接待過的香港客仔,但不果。
找不到舊客惟有搵新客。「佢」在當年還未有忌廉哥的尖東,遇上了黎耀祥。據職業是的士司機的黎耀祥單方面透露,自己有個老婆但已被他趕走,同老母亦唔夾,但就依然將個女交俾老母湊。黎耀祥把「佢」車返去自己那冇雷公咁遠的村屋屋企。交易完畢,唔多happy的黎耀祥叫「佢」走,「佢」故意把一條頸鏈遺留在廁所。
另一個晚上,黎耀祥正準備帶另一名妓女返歸乜乜,突然一架開得超快的車衝過來——但並非攞命,而是擺明針對黎耀祥對腳。腳打住石膏的黎耀祥不得不匿喺與世隔絕村屋,這時候,「佢」來了,話自己上次留低條鏈喺廁所,同時為上次自己的服務不周致歉,並決定好好咁服侍番以作補償……
不良於行,不代表不鹹濕。黎耀祥把門打開,一場血腥的禁錮開始了。而以上交代的,只是成件事之極小部分。
1.過去專演慘情女子的吳倩蓮,在《恐怖雞》收起慘情,變成了單憑一個眼神已足以叫你淆底心寒的大陸女子。看牌面,似乎是《危情十日》(Misery)的港式變奏,但《恐怖雞》要說的其實更多,吳倩蓮勒死妓女再禁錮黎耀祥,都不是基於變態,一切都不過是計劃的一部分。
2.黎耀祥是由頭至尾的不幸受害者,而他過去人生的不知所謂,更在某程度上嚴重化了這一場悲劇(連冷血如我都不忍看下去,唉)。即使全程被「綁手綁腳」,但他的演出還是不慍不火,啱啱好。
3.有份演出的其實還有另一位視帝,陳豪——最後十五分鐘才失驚無神出場,成個慘劇的高潮位。先旨聲明,這個陳豪,絕對不是你們今天在《法外風雲》所認知到的嗰個。
4.電影的編劇導演同是曾謹昌,周星馳近年的戲他都有份寫。擅寫喜劇的他,竟然交出了這麼一個殘酷到冇情講的故事;作為首次(和唯一一次)執導,已經極度成熟,即使一睇就睇到箇中超低的成本,但對完成品不構成影響。
在1998年看這部戲,感受會有,但未夠深。事隔多年,2013年再看,才終於看到寒意。
以前的《省港旗兵》,是以大圈仔來港打劫食大茶飯渲染回歸的恐懼感;《恐怖雞》要說的是,吳倩蓮來港已不再為食甚麼大茶飯,而是要取代香港人的身份。散場前最後一句VO,更是全片恐怖精髓。不爆出來了,自己睇吧。

4 則留言:

  1. 當年還算是童年,看完好深刻,最難得是以手換手那一招
    但後來又在怒火街頭看到以斷手開指紋鎖,總覺得兩者一脈相承

    回覆刪除
  2. 有人寫了就好,看到《法外風雲》以兩大視帝久違的合作交鋒作招徠,早就想到了這部電影,第一集的法庭戲,陳豪所飾演的律師代表大陸客,更有所感。

    回覆刪除
  3. 當年套戲唔收得 仲俾人係某大場合囉黎講笑 大致意思如下(其實我唔係好記得): A君:香港既電影絕對可以有鐵達尼號既水準 B君:但香港既票房已經變左做恐怖雞啦!

    回覆刪除