浪漫月巴睇舊戲（五十一）：這一天，向林正英和許冠英致敬

係老友都知我是喪屍fans。但對於著住清裝跳吓跳吓的殭屍，反而冇乜興趣，所以在上世紀80年代末至90年代初的港產殭屍潮，冇乜follow。至於一手帶起成個熱潮的《殭屍先生》就非常鍾意。鍾意，是因為裡頭的人。

公式：「嘩有殭屍吖，搵林正英啦！」 

對於殭屍，我們的電影人曾經搶拍、狂拍，拍到濫拍地步。

問題是在狂拍的過程裡，從來都沒有作出深究，以致沒有給予對這個類型和這個題材一點進化，一點意涵上的深化。所以當開到荼蘼，會發現，那幾年被濫拍出來的殭屍片，大抵只是換了一些基本設定和時代背景和笑料，而同樣是在交代一個「嘩殭屍出現了，（林正英）快去收服佢吧」的過程。

作為核心的殭屍，也只是個最核心的基本設定，基本到不要求有甚麼（劃時代）進化。

到了20年後，《殭屍》出現，把《殭屍先生》大部分演員來一次結集，說了一個對過去留不下也放不低的故事——沒有了過去殭屍片即使死到臨頭都仲要拚命搞笑的荒謬，而只有當生命悲涼到盡頭而幻化出來的另一種荒謬。所以，有人話《殭屍》純粹借《殭屍先生》過橋——但我會咁諗：Remake一齣《殭屍先生》出來又有甚麼意義？

又喊又笑同時又好溫暖 

最近兩個深夜，翻炒了兩鑊《殭屍先生》。這兩鑊裡，我依然唔覺悶，仲有笑（有幾下仲係笑到癲咗兼嘈醒喵嗰隻），亦有眼濕濕（但我強忍住！）；而更多時候，是有一種暖暖的溫馨感。

《殭屍先生》基調就是一部笑片（大部分80年代受歡迎港產片都是以笑片作為基調），但今時今日睇番接近三十年前寫落的笑料，其實已經唔多好笑，我仲笑，純粹因為演員的演出。

孭起搞笑部分的是許冠英和樓南光。以前唔太鍾意睇樓南光做戲，但又不得不承認，樓南光演貪威識食認屎認屁（但內心深處又唔算衰得晒）的人種，真的無出其右，基本上只要佢一出場，你就可以指住銀幕話：嗱嗱嗱呢啲人咪貪威識食認屎認屁（但內心深處又唔算衰得晒）囉！而且你通常都憎佢唔落，仲可能會有丁點兒親切感——因為塵世間大部分平凡人，咪就係呢一類人。

許冠英，由許氏三兄弟合作年代已經專演（必定俾大佬搵笨，靚女就必定俾細佬溝晒的）下靶。但許冠英式下靶，從來都是善良的下靶。在《殭屍先生》他由頭到尾都冇乜建樹，打殭屍唔輪到佢之餘，仲中埋屍毒，在變異成殭屍的過程裡佢甚至懶有大志咁話：就算做殭屍，都要做一隻長命百歲嘅殭屍。不過下靶的他不失善良，從一個不起眼細位可見：有隻阿伯殭屍跳極都跳唔上石級，唯獨許冠英願意行埋去扶實對方：「阿伯我幫你吖。」超愛呢幕。

眼濕濕部分。錢小豪與王小鳳的一段人鬼戀，即使成段冇咗都不影響主線劇情，而講真，保留下來反而仲有少少突兀——但我唔介意。我自小便（被身邊人指責）情迷王小鳳（是一種罪）。

這段感情，自然沒有好結果，而作為全宇宙最正氣道士的林正英，更自然容不下鬼（戀上自己徒弟）：「你知唔知人鬼唔可以喺埋一齊？你咁纏住佢，盞害死佢咋。」但最後，林正英的處理，王小鳳的眼神，我差點哭了。

還有暖暖的溫馨感。這來自林正英許冠英錢小豪這三師徒。面對不成材的許冠英和叻唔切的錢小豪，林正英是注定終日被激到炸開，但當徒弟仔一個中屍毒一個俾鬼迷，作為師父，還是會緊張的。他們仨，是一組流露自然情味的師徒關係。

最後，仲有少少想講：1.陳友。其實只在一頭一尾出場，但搶戲到爆。以下是我亂諗：他在《殭屍先生》裡演的道士，有可能就是《殭屍》裡友哥的阿爺。2.對白。押韻得來，既符合時代背景，亦帶出一點點做人道理。林正英：「人分好人壞人，屍分死屍殭屍。人變做壞人係因為佢唔爭氣，屍變做殭屍就因為佢多啖氣。」錢小豪加把嘴：「做人要爭氣，人死就最緊要斷氣，如果死唔斷氣咪盞害人害己。」細味一下，簡直是對今時今日不少人的暗諷。

11月8日。林正英和許冠英分別在十六年前和兩年前的這一天逝世。由衷感謝兩位在《殭屍先生》的完美演出。