秋高氣爽，正是郊遊的好時光。

這是我人生中第七次寫呢句嘢。過去六次，分別寫在小學一至六年級的作文功課。其實準確一點應該咁寫：秋高氣爽，正是BBQ的好時光。

我承認，我唔識透爐。
在高登看到一篇分享文「[毒到出煙]一個人BBQ分享」，我遙遠的BBQ回憶忽然湧番出來。
孤單的我試過一個人放題一個人Buffet一個人打邊邊，但真的未夠膽去一人BBQ——不論是室內還是室外。
室內BBQ，我驚慘變燒炭死於非命。
室外BBQ，嘩太型了吧。偏偏世人不會欣賞和明白這一種型。
其實引致我不能一人BBQ的最主要原因是：唔識透爐。
真的，由三年班第一鑊秋季旅行至今，我都未能成功透過一個完美或不完美的爐。我甚至開始懷疑，不是炭精同我過唔去，就是啲死鬼炭同我有仇。
所以每次跟同學去親BBQ我能夠做的就只是：撥火。當同學既優雅而又不慌不忙地搭好啲炭，我就拎住報紙死命地撥撥撥。但女同學只會欣賞那個優雅而又不慌不忙的同學，而不是身水身汗的我。
既然付出的汗水和手力不能換來女同學垂青，我變得自暴自棄，每次秋季旅行當同學在透爐，我便袖手旁觀——但更多時候，是被指喝拎啲燒烤叉，去插沙。Well，大家都應該知道洗燒烤叉是要先插沙再用清水洗吧。

難忘那10條腸仔交織而成的美味
人生中有幾次BBQ，我化灰好記得。
1.小三嗰次。我讀的那間小學（位處牛頭角下邨，早已灰飛煙滅），規定小一和小二生不准BBQ——BBQ恍如一種象徵成長的儀式、祭典，於是一班同學都好想快啲順利升上三年級。直至終於等到了小三秋季旅行，我們五、六個同學隆重其事從長計議地分工，你買炭和炭精，我買紅腸和腸仔（我是燒腸達人），佢買雞翼豬扒……然後，到達現場，才發覺透爐原來比考試仲難。
2.小五嗰次。咁記得，是因為地點——（我本人認為）人生必到香港郊野公園No.1的大澳門。那天燒過甚麼？不記得了，只記得大家匆匆忙忙燒完腸與丸和若干隻雞翼後，便衝到那個對住海天一色的大斜坡，放風箏！放到累了，便攤在那個翠綠色斜坡傾偈吹風。我可以大膽講，瞓喺草地眼前只有一片藍天及幾朵雲，感覺就是，無與倫比的正（去camp的晚上望住成天星星，同樣地正）。咁多年來，我只是去過一次大澳門，但當日的藍天，還存在於我腦裡的硬體，不會delete。
3.中三暑假。大嶼山南山營地——有同學話嗰度好靚好想去喎，於是一行二十人便為了滿足同學的個人願望，由梅窩碼頭出發，在烈日下，又越過高山又越過谷，行行行行行行足45分鐘，終於行到那個傳說中的南山營地——那一天我燒俾自己食的10條香腸，應該是成世人最美味的10條。至於你問我南山營地靚唔靚？我實會話靚，如果唔係，都唔會在中四暑假冒住中暑危險再去一次。

親自透爐是很重要的事！
突然很想知道現在學生去秋季旅行仲會唔會（或准唔准）BBQ，於是不斷問人。
得來的答案是：中學生大致上都容許BBQ；小學生呢，視乎年級，基本上，只有六年級先准……
我好記得一個畫面。在小三旅行首次透爐期間，阿sir袖手旁觀，當我們不停用目光向他發放求救訊號時，他keep住袖手旁觀。
識唔識透爐其實無關宏旨，反正第日見工時老闆不會問你透爐經驗，而擅長透爐也不見會成為一樣社會認可的成就，但重點是：他的冷漠，原來是為了讓我們從錯誤中學習，學習怎様親力親為兼獨立地完成一件事——即使只是透爐這麼一件小事。
有朝一日香港或許會冇晒郊野公園，BBQ變成存在於TBB劇結局裡的都市傳說。香港的秋和冬季，只容得下百貨公司感謝祭。