哀悼（連一間漫畫店都容不下的）沙田

人到中年，事業無成也沒甚麼世藝的月巴K，咁多年來最大興趣始終是睇漫畫。

 

沙田友，前往沙田市中心 

以前，乜漫畫都睇，但近年放棄了港漫，只睇日漫美漫。買美漫，只能過海到山長水遠的銅鑼灣中心，但每逢周日那條街那商場都迫滿了放假的海外女傭。月巴K只會選平日才去。
買日漫簡單得多，搭十幾分鐘巴士去好運中心便可以了。
剛過去的周日，作為沙田友的月巴K準備前往沙田市中心，買幾本新出的漫畫。
 

一個雞汁小插曲 

落樓，信箱好似有信。
打開信箱，內裡沒有一片迷惘，卻有一包雞汁。雞汁附有一小本食譜，食譜封面是一個笑緊的May姐。食譜收錄菜式有蝦仁炒蛋、炆冬菇、豉椒蒸排骨、炒米粉等等……月巴K詫異：原來世界已發展到一個煮乜都要落雞汁的匪夷所思地步。
但月巴K從來沒有下廚習慣，這包不知由誰寄來的雞汁（斷估不會是May姐吧），就像雞肋，食之無味落之可惜。
 

在新城市廣場只屬過客 

到了新城市廣場。這商場，這沙田地標，月巴K簡直睇住佢大。裡頭商店望落琳瑯滿目，但都不是月巴K會幫襯的——食店，貴夾唔好食（奇在門外又長期排滿人）；賣衫的，好似懶名牌但其實大部分商場都會有；其他的，不是賣金和藥就是賣化妝品。專愛留意無聊嘢的月巴K更發現，商場甚至把原來的行人通道，索性間埋做小櫃位兜售化妝品。沙田友對美的demand原來咁鬼高。
但從月巴K的觀點看，就算這裡開了一億間金舖藥房和化妝品店都冇所謂，因為他本人來沙田市中心，目的就是買漫畫。在新城市廣場他從來都只是掂行掂過的過客。
路過沙田廣場，月巴K瞥見那間上了市的茶餐廳門外又排長龍。他不期然在內心深處爆了一句粗：X使唔使吖咁都要排……（如果肚餓他會專登走去瀝源邨）
終於到達目的地。漫畫店櫥窗依舊排滿新出的漫畫，分別是櫥窗當眼處貼了一張紅色的紙，紙上用黑色箱頭筆寫著四隻字：結．束．清．貨。月巴K憤怒了。
 

當沙田不再是沙田 

月巴K不是成日緬懷過去的人。事實是他的過去也沒甚麼顯赫。
但記憶，從來都是對記憶持有人才有意義，是用來證明過去存在的一點憑藉。像他唸過的小學，位於牛頭角下邨，以前搭地鐵經過九龍灣站必定望到，現在，剷成平地。望著那笪平地月巴K覺得自己的一忽「過去」也被剷走。但OK，鬼叫要「發展」，呢兩隻字是大晒的。
但這間月巴K幫襯了廿年有多的漫畫舖執笠，同發展無關，而只同加租有關——就像毗鄰幾個商場，原來的店舖都被執笠，換成一個個被業主認為可充撐場面，以及更啱客路的得體商戶，亦即每個商場都會見到嗰啲囉。
曾經，好運開滿唱片舖game舖漫畫舖，月巴K每逢放學後都會死去行，冇錢買嘢？齋睇都開心。月巴K和好幾代沙田友的青春，都在這裡和還未開滿金舖藥房和化妝品店的沙田市中心找到註腳，他們都曾經作為這幾個場所的核心。但沙田已不再是沙田，發展到連一間漫畫舖都容不下。而月巴K和大部分沙田友，如今都被踢埋一二邊成為沙田的邊緣人。
就像大部分香港人，持續地被邊緣化兼被雞汁的單一餵飽（而又不自知）。