無止境的島田莊司地獄……

《龍臥亭幻想》

《龍臥亭殺人事件》令我睇到想死，期間為咗唔想死得咁不明不白而停看，先睇另一些書，等有番生存慾望先至捱埋落去。
《龍臥亭幻想》沒有這個問題，島田莊司對杜撰和史實的處理，算係恰如其份，即使都係離唔開有點長篇大論，又或一些失驚無神的濫情描寫，但整體，OK。
至少我睇得頗快。期間也沒有萌生死的念頭。

《異邦騎士》

一本我買咗好耐拎起咗好多次亦放番低好多次的島田莊司早期作品。
在推理性和怎樣演繹推理過程方面，比他後期那些扮鉅著的來得高和好，但同樣問題，島田往往在一些主觀心理描寫上來得死唔斷氣，情感又太過令人打冷震，但睇到最後，還是會有一點點感觸和感動的。
前設是：你必先睇過好幾本有御手洗和石岡出場的小說才好去看。

《御手洗潔的問候》

又係買咗勁耐的書。人家再版時連封面都改掉了。
內裡收錄了四個短篇，竟然是OK的，而且竟然比起御手洗潔某些超長篇探案更OK，至少睇得夠爽。
還有，御手洗潔出場夠多，而每逢出場時亦頗寸——睇御手洗潔的探案自然是為看他，不像島田莊司日後的小說，竟然夠膽死唔俾佢出場，又或者要你捱到本書差唔多完時，先至肯俾佢出場。
我始終覺得島田莊司是屬於80年代的作家，他筆下的80年代日本，幾動人。但80年代過後，他經常把場景設於海外，或許連他本人都不再喜歡日本吧（事實上他後來是旅居洛杉磯的）。

我明明話過唔再睇島田莊司的，但手頭上還有《螺絲人》和《水晶金字塔》。好似欠撚咗佢咁。仆街咯。