夢是唯一的真實

呢篇嘢，我明明已經在夢裡面一早寫完的。

發過夢的你們，大抵可以明白我瞓醒過後那份惶恐，同埋失落。

搞錯！竟然翻炒《Inception》都唔睇翡翠明珠
《Inception》上咗畫近一個月，已經有大把「影評人」寫過這齣戲了，有些捧到上天，有些貶為一齣故弄玄虛的荷李活動作片（imdb投票所得的分數則有9.1，排第3位，僅次於第1位的《月黑風高》和第2位的《教父》）。
我本身好鍾意《Inception》，即使身邊non-stop地有人同我講：1.點解有錢仔咁有錢居然會搭taxi？2.有乜嘢動機令狄卡比奧呢team人走埋一齊？3.去到雪山即係第三層夢境呢已經見到導演技窮了！4.狄卡比奧同老婆嗰段情根本搵嚟搞完全唔感動囉。5.你根本就係盲目去捧呢個導演場！6.拍呢類深戲梗係要搵歐洲導演啦……
同樣的質疑和聲討，我還可以繼續列舉落去。他們似乎好想在我腦裡植入一個概念：《Inception》其實係唔掂的。
只是，我很努力的去防護自己的潛意識，不容許被別人植入一些自己不想認同的概念，而為了鞏固信念，上星期仲特登揀一個應該冇乜人睇戲的時段，睇多次《Inception》。結果——我明明以為應該冇乜人買飛啦，又或大部分人都應該去咗睇那齣甚麼翡翠明珠的（林峯坐擁好多死忠fans的啊）——依然全院滿座，而我坐的那個位，比一個月前睇的時候仲要衰，以致Ellen Page塊面全程歪埋一邊。

夢是性壓抑的解放
當然，《Inception》不是第一齣拍「夢」的電影。
太古老的我不清楚，第一套讓我觸及「夢」的肯定是《猛鬼街》。
拍血殺片起家的Wes Craven，抽取了自己孩提時發噩夢的經驗，創造了Freddy Krueger這個被活生生燒死的serial killer，在死後帶著怨念潛入別人的（綺）夢裡，繼續殺人，而殺的，主要是後生仔/女。
今天的精神分析自然不會再把佛依洛德那一套奉為聖經，但他把一切精神問題及夢的解釋都歸結是源自人類對性的壓抑，卻帶契了日後的創作人，可以大條道理地拿性來做文章。像《猛鬼街》，咁多集的主角都是處於青春期高峰的少男少女（當然，這類戲的主要觀眾也是處於青春期高峰的少男少女），對性既充滿無知、但又躍躍欲試嗰隻。結果，在戲裡對性表現得最開放和大膽的，通常都會命喪於Freddy之下；而由始至終最忍得、最堅貞的那一位（但唔代表佢唔想試），往往成為最後的倖存者。
性在這類電影裡就是死的先兆。原來，甚麼《猛鬼街》、《黑色星期五》、《月光光心慌慌》都是在苦口婆心地，勸喻青年男女不要亂搞嘢——即使片裡經常出現裸男和裸女。

在夢裡我成為富豪第二代……
把「夢」拍得更勁的是David Lynch。
2001年的《Mulholland Dr.》（後來香港推出了DVD，譯做《失憶大道》，這個譯名其實有少少誤導），便是一套無講到明係拍「夢」，但其實係拍緊「夢」的——勁嘢。
片長拍得住《Inception》的《Mulholland Dr.》，我實在不知道怎樣去形容，甚至，即使我穿晒橋，也不代表你會睇得唔再過癮——偏偏最大的問題是，就算我想穿橋都穿唔到，因為片裡頭哪些是現實哪些是夢？我都冇辦法一一講得清……
多年來，不斷有人為了這套《Mulholland Dr.》進行深度討論，David Lynch本人也經常被問及片裡層層好似真又好似假的意象，而每當面對這類情況，他總是全程保持緘默。偏偏在美版DVD裡附有一張紙，紙上面好衰唔衰地列出了10點，10點都是David Lynch給觀眾的提示，提示你在睇戲時倍加留意就可以睇得更通……我試過咁做，但可能我蠢，似乎唔多有效，感覺上好似（又）俾David Lynch玩咗鑊，但我又好甘心俾佢玩。
David Lynch不像Christopher Nolan，沒有試圖藉着Naomi Watts（《King Kong》女主角）同你解釋清楚甚麼是夢，夢有乜作用，夢又分作幾多層，事實是連電影裡的Naomi Watts，都不知道自己原來一直在發夢，藉著夢去完美化自己，藉著夢去修補現實中已經被永遠破壞了的關係，藉著夢去完成現實中永遠不能被完成的夢想……
現實裡的我們也是充滿缺陷和失落的。我決定從此不再捱夜，早啲瞓，瞓多啲，因為唔瞓，就冇得發夢。
講到近排最想發的夢，肯定是化身成富豪第二代（唔想做第一代。第一代要白手興家，好辛苦啫），跟其他第二代和洋妞港模坐住遊艇出征……大家若然見到瞓緊覺的我在笑吟吟，請千萬不要叫醒我。
但我同時好驚在夢中被植入一個概念：翡翠明珠，好睇。

（原文刊於am730）