他們都是（被迫）這樣長大的

《Boyhood》，好睇。好睇不純粹因為用咗12年去拍，而在於那一份「冇嘢」。

成長應該就是如此「冇嘢」
成長應該是：沒有死人冧樓，而只是返學（懶理是真心想返定真心唔想返）、媾一（或數）次女（不理是為媾而媾定真心想結婚）、被撇（或你撇人）、躝街躝夜咗返屋企俾大人嘈兩句……然後慢慢摸索到自己的心在想甚麼，唔覺唔覺，長大了。
如果Richard Linklater把Mason由6至18歲的成長特登寫成高潮迭起波瀾壯闊，未必唔好睇，但偏偏他的成長就是如此唔覺唔覺，而我們亦跟隨鏡頭推移，唔覺唔覺地，才驚覺已經快速閱讀了一個男仔（既真實又虛構）的12年成長史。
時代，則陰濕地留下痕跡，但你和我及Mason都來不及察覺，已經開始面對成年人世界。
過程中，我們抓不住任何一刻，卻又唔覺唔覺被時刻抓住、影響。時間的殘酷就是這麼陰濕。

一個港孩的成長分場
我在想，如果有導演也拍一齣《HK Boyhood》，捕捉一個港孩由2002至2014年、由6至18歲的成長軌跡，又會點？
分場已寫好，男孩名字，就叫「巴仔」吧。他住在九龍東。
2002：巴仔升小學了。基於所屬校網（和父母背景），他唸的不是甚麼強橫小學，但他冇所謂，他最有所謂的是不得不面對另一個環境。至於董建華的連任，連大人們都唔輪到佢哋有所謂，何況是一個6歲細路？
2003：巴仔看了一齣賀歲片，片裡有一個成日在電視見到的風水師傅，師傅話：今年香港行大運啊！他不知道一個地方行大運是否代表人人日日都要戴口罩，而只知道他的一個同學因為要去度假村隔離，唔使返學！這才是真正的行大運啊。
2004：某日，搣時帶巴仔及同學們去剛開幕的星光大道。「啲星呢？擺明呃遊客啦。」巴仔心想。但因為唔使返學，算啦。
2005：在某個打波先嚟落雨的日子，巴仔拗了完美的柴。腳痛，但依然要包住石膏返學……巴仔唔明，Why那個董建華可以因為腳痛而辭職，而他就不可以同樣因為腳痛而休學？佢嘗試問大人，大人只話：大人嘅嘢細路唔好理。
2006：自細便是《警訊》fans的巴仔，認識了「魔警」這詞語。塵世間很多事物都不是（大人）話係咁就咁。他似懂非懂。
2007：讀大學的表哥靜靜雞帶巴仔去了皇后碼頭。巴仔首度在商場以外地方見到咁多人，人群之中還有周．潤．發。那天是4月28日。他不明白Why咁多人要去保護一個碼頭，但更不明白Why有班人又一定要去拆咗個碼頭。
2008：巴仔每日放學後就匿喺房努力上網——等待「好朋友」把新鮮上載的「明星閃卡」send來。一早已睇過吓鹹片的巴仔，對「閃卡」內容並不驚訝，他只驚訝那些所謂藝人明星，平日冰清玉潔，原來相當野性。表裡不一，大人之王道。
2009：他發現過去在派利是上相當闊佬的姑丈姑媽，表現突然審慎起來，由過去每人五百蚊變成兩位夾埋先得嗰四十蚊……後來在姨媽姑姐八卦言談中隱隱然知道：金融海嘯下，姑丈姑媽身家蒸發了九成。巴仔首次體會外圍經濟對自身的影響。
2010：巴仔安然度過了一個沒有8號風球的夏天。颱風燦都吹襲香港的那天，4人死於非命。
2011：N年冇睇電視的巴仔迷上了《天與地》，無奈屋企人話唔知拍乜，勒令轉台。只可惜生命是必需妥協。
2012：特首選戰。巴仔明白到睇政治人物黑材料，竟然比起睇那些藝人無聊緋聞更具娛樂性，政治人物演技也比藝人好。問題是他們普遍面目可憎，不及藝人靚仔靚女。
2013：巴仔感到一股躁動。香港正在劇變，變得更衰，衰到已非香港人適宜居住……難怪特首成日苦勸香港青年應該出去走走——感覺，好似叫我快啲躝。
2014及其後：捱到夠秤了。品嘗過催淚放題的巴仔在思考：如果（唔聽特首話）繼續死留在這地方，應該升學還是搵工抑或儘快申請公屋？基於有個（唔知邊度彈出來的）甚麼青年事務委員會主席說：大學生申請公屋是放棄自己，巴仔便諗：不讀大學，就不會成為大學生，那麼申請公屋就不算是放棄自己了。
巴仔終於成長了，成為大人眼中的完美廢青了。唔覺唔覺。
而巴仔自小居住的九龍東也將成為建立甚麼聰明城市的試點。
（加咗兩句，原文刊於am730）