世界好嘈，有些聲音永遠聽不到

寫這一篇前的一個深夜，我病，食了藥，但又瞓唔著，在床上輾轉反側。

1.

明明鬼影都冇隻，但腦海keep住響起不同人的聲音：1.自己把聲，不斷在叫「快啲俾我瞓啦」；2.

某個前阿頭把聲，不斷在嗌「你揀相好冇腥屎囉」；3.某特首把聲，佢究竟講乜我唔鬼知——我從來都唔知佢講乜，但佢又一直講講到我心煩氣躁。
人的記憶很奇妙。我們未必好清楚記得某些景物某張人臉，對於聲音的記憶，總是好深刻。
與其在床上典來典去被心裡的嘈音干擾，索性起身，隨手拎本書睇，諗住揭幾頁揭到有睡意。
我拎起一本漫畫。《聲之形》。之前睇了幾頁，但投入唔到。結果，這一晚，把兩期睇晒（暫時中譯本只出了兩期）。
故事之前已略有所聞。望落，似是純愛系的畫風與設定，事實是有關聽障少女西宮硝子轉校後被欺凌的故事，帶頭欺凌佢的是一個男生，石田將也，但故事發展下去，石田反而成為被欺凌被孤立的一個（這是故事最難處理的地方）——由小學到高中，他都孤單一人，他開始明白自己當日對西宮的行為，是罪無可恕的，他決定在自殺前補償，向對方說聲對不起。
這麼一個（但求自我感覺良好的）行動，演變下去，讓石田知道是絕對不足夠，他希望跟對方成為朋友，問題是女孩那段悲劇的小學年代是怎樣也補救不來……第二期完，故事待續。

2.

我想起一個人。中三時的一位同班同學。
對比我，她絕對是品學兼優類型，唔知點解地，竟然跟品學俱不優的我熟絡起來，甚至交換了電話號碼，自此她不時在放學後打俾我傾閒偈。有一次，佢媽咪突然要求同我對話，但竟然不是鬧品學俱不優的我教壞佢個女，而是說：佢個女冇乜朋友，希望我可以做她的朋友——好多年後我依然記得佢媽咪把聲。
中四開學那一天，她如常打電話俾我，但原因不明地我突然覺得好煩，唔想再傾（又或者是唔想再聽到佢把聲），我說：我而家好忙，要煮飯（其實只是幫手洗米）。「咁等你煮完飯我打俾你可以嗎？」她問。「唔得。」我說。
「聽日呢？」她問。「我之後都好忙，你唔好再打俾我。」從此以後（甚至直到永遠），她都沒有再打俾自稱好忙的我。
好多年後才知道，中三那年她爸爸有外遇，父母經常嘈交，她和細佬所能做的，就是匿在房裡聽住兩個大人嘈交的聲音。
我突然超憎當日講出「你唔好再打俾我」的那個我。我甚至記得自己嗰把衰聲。這把衰聲似結成了一樣物件，多年來塞喺心裡面，平時唔覺，直至這個深夜突然現身，令我個心un住un住。

3.

世界愈來愈嘈。除了好多高高在上的廢人每天都在發出噪音，還有太多人急於透過不同媒體表態：一個人死了，有班人爭住發文悼念，然後又有另一班人搶住發文說人死了才悼念有乜用，然後再有一班人進行正反合結案陳辭（還未計一些連自己寫咗啲乜都唔知）……然後再然後，大家把一切忘記，一切煙消雲散，心急等待另一次表態時機。
但有些聲音永遠都不被聽到。像那一份甚麼民情報告。最後我只被報告一個「事實」：讓香港如期依法落實2017年普選行政長官是中央、特區政府和香港市民的共同願望——What？我有咁講過咩？又或，我根本從來不被認為是香港市民，我只是被欺凌的人。而當石田有朝一日終於明白自己一直在欺凌別人時，呢個政府，絕對不會有這份醒覺。

4.

這一刻我只想跟她講聲「對唔住」，問題是，我根本（不是「跟」本）不知道怎樣才可找到她。當然，她可能已不把我那句話放在心裡，甚或已經完美地忘記了我。
（2015年1月7日，原文刊於am730）