每逢畢業典禮我就倍添感慨。A.感慨自己畢業N年；B.感慨一班莘莘學子終於離開學府進入社會——面對真正的大人。
你食鹽多過我食米？我食Buffet多過你食Rice！
所謂大人，無論職業貴賤搵得多定少，總是偏愛講某一類說話——可能為了證明佢的而且確係大人，也可能佢真的除了講呢啲就唔識講其他。以下10句，你有冇聽過人講？又或你本人有冇講過？
1.「唔准咁做！」——就是字面意思，同時隱含一個意思：說話者就是權力者。
2.「識埋呢啲嘢有乜用？」——通常是由唔識某樣知識、技藝的大人專用，而佢又唔想因為自己唔識而自貶身份，於是索性把你的知識踩到一文不值，來維護、高舉他本身的無知。
3.「嗱，我經驗始終多過你。」——講這句話的如果不是經驗主義者，就是RPG主義者，信奉經驗值。
4.「我食鹽多過你食米！」——由第三句衍生出來。問題是，Why一定是鹽而不可以是糖醋豉油或Tabasco？食鹽多，好巴閉嗎？換轉我會咁講：我食Buffet多過你食Rice！
5.「後生仔始終係後生仔。」——新加坡賭王陳金城金句。結果佢輸咗俾後生仔高進（高進對陳金成的稱呼是：老狐狸）。
6.「我對你好失望。」——好像只有大人才有資格失望，後生的只能令人失望。
7.「妖，而家啲後生真係廢……」——通常不會當住你面講，而只會成班大人圍埋時先講，又或喺心裡面講。
8.「等阿叔教精你啦！」——通常講得出呢句話的阿叔，精極有限。
9.「你而家咪好囉，我當年乜乜乜……」——大人唯一比後生多的，就是經歷，於是經常化身講故佬，講一些對佢好寶貴但對被迫聆聽者零用途的陳年故仔。
10.「呢個世界並非你所諗咁簡單。」——世界、宇宙之構成的確好深，好多大人睇完《星際啟示錄》都問Why蟲洞冇蟲。
最奇妙是，以上10句竟然可以結合成一個完整發言：「唔准咁做！識埋呢啲嘢有乜用？嗱，我經驗始終多過你，我食鹽多過你食米！後生仔始終係後生仔，我對你好失望（同時心諗：妖，而家啲後生真係廢……）；等阿叔教精你啦！你而家咪好囉，我當年乜乜乜……呢個世界並非你所諗咁簡單。」在過去，以上發言已經足夠KO後生仔。
但時移世易，上述咁完美的大人表述並不足夠，不妨在最後加多一句：「十年以後當思我。嘿。」
所謂大人……
那個午後我有意無意經過畢業後返第一份工的地方。不禁想起17年前面對過的大人。
有一些，恃住自己係大人明恰我；也有一些，無條件地乜都教我。有一些大人當日懶權威的見解，事後證明錯晒（例如話網絡絕對不會取代實體閱讀）；也有一些，一句說話，立即成功幫我開腦，事隔多年依然啱用，實在令我無言感激。
所謂大人，究竟係乜？我每天都以一個大人身份返工放工食飯屙屎瞓覺，我是否就是一個大人——一個稱職的大人？
以上10句大人之說話，實不相瞞，我一句都冇講過（其實有講過「唔准咁做！」，不過係對住我的喵講），可能是我的職級未去到可以講這些說話的層次，也可能是我未去到可以輕易講這些說話的階級——而真正原因其實是：我憑乜去話後生仔？
所謂大人，不少都是已經服．從．了．命．運．的．人。
既然是命運，整定嘞，於是對塵世間很多（由大人之上的大人物所定下的）規條，不合理又好勁不合理都好，只管follow，一旦見到有人不去follow（通常是比佢哋後生的），就覺得礙眼、唔聽話、有冇搞錯諸如此類。
十年以後當思我。我慶幸自己仲未成為當日我憎的那類大人。
（原文刊於am730，19/11）
沒有留言:
發佈留言