先旨聲明，本文不是同大家分析Matthew Mcconaughey的演技有幾精湛，又或他有幾型。想說的其實是：我曾經好憎佢。各界Matthew粉絲，得罪了，sorry。
一齣令我嬲到想鋸死人的Matthew舊作
我有一個無聊習慣——睇維基。
在維基link吓link吓，便可隨時得到一些自己從來唔知（但肯定對升職加薪無用）的資訊。像星期一中午，當知道Matthew攞到奧斯卡影帝，立即在維基search佢。
結果發現了一個驚人事實。多年前我已經欣賞過Matthew的狂放演出。那是一齣叫《德洲電鋸新世代》的青春血殺片（中文名是我本人亂作的，英文片名是《Texas Chainsaw Massacre: The Next Generation》），20年前的製作。係人都知我是Leatherface的fans，所以一見到封套上有條友笠住面具兼手持電鋸並作準備鋸嘢狀，便毫不理性地拎去俾錢。
畢竟是很多年前的事了，已經忘記晒齣戲講乜，唯一記得的是唔知個導演喺度拍乜，全程得班冇腦青年男女在逃亡和慘叫，完全喪失元祖《電鋸》的精神，絕對是一套有辱家聲的系列作！我甚至憤怒得想即刻飛去美國用電鋸鋸死一眾台前幕後（這只是比喻，現實中的我其實好溫文和好Nice）。
套戲令我太憤怒，而憤怒會嚴重影響觀察力，我完全冇留意男主角原來就是Matthew，sorry。
型仔和好醒的型仔
血殺片需要大量青春男女被砍掉，好多荷里活一線演員未紅時都拍過（當然拍過而不紅的也大有人在）。因為靚仔啩，Matthew漸漸紅起來。我自然冇睇晒他成名後的作品，但都睇過唔少，發現他的角色離不開sell兩種嘢：1.型仔；2.好醒的型仔。
齋sell「型仔」，好簡單；要sell「好醒的型仔」形象，相對較難，一個不慎便會招來觀眾反感——事實是，的確令我好反感。
Matthew「好醒的型仔」形象大可見諸兩齣戲：《Sahara》和《Fool's Gold》。
兩齣戲，我擺明是因為女主角而去睇——《Sahara》是為了Penelope Cruz，《Fool's Gold》其實是為了Kate Hudson，但同樣因為那避都避唔到的好醒的型仔Matthew，睇到中途便放棄（問心，兩齣娛樂片其實都頗悶）。
鍾意不鍾意一個演員，從來都好主觀，總之我就係頂唔順那好醒的型仔Matthew啦，sorry。
演員的一次「砍掉重練」
演技，究竟是甚麼一回事？——咁深嘅問題我自然唔識答。
只能說，我從不認為減肥50磅或增肥50磅就是演技，頂籠只是演繹某一個角色時的配套，又或宣傳的噱頭，像Matthew減到得番棚骨去演的那個愛滋病患，我們注意的不應該是他的「得番棚骨」，而是他對於那愛滋病患的演繹，是否真的進入那名角色的內在，再透過自己，反映出來。
但「得番棚骨」對Matthew本人來說是重要的。他願意拋去過往那一個用來呈現「型仔」及「好醒的型仔」形象的外殼，而這個外殼，既幫咗佢，亦限制住佢——OK，或者片商或觀眾（不包括我）依然願意接納他是一個好醒的型仔，但他再做落去也只能做一個好醒的型仔。這是一條型仔的死路。
Matthew當日決定改戲路，是作為演員的一次「砍掉重練」。
而因為維基，我又認識多一點Matthew。2005年Katrina吹襲新奧爾良後，他幫手拯救過不少流離失所的動物；2006年他駕車到加州，偶然見到兩個後生仔將髮膠搽勻一隻喵，正準備點火……Matthew睇唔過眼立即落車救走喵喵！他對其他生命的尊重、見義勇為，講真，令我肅然起敬，並決定找回他的舊作看，重新認識這位演員——但我打死都唔會睇多次《德洲電鋸新世代》，sorry。
（原文刊於am730）
沒有留言:
發佈留言