2013年12月13日星期五

浪漫月巴睇舊戲(五十五):未變身花女的豬女,一次菜鳥的進化史




















TVB花旦中我只見過徐子珊和黃智雯,其中前者仲見過兩次,都是同事跟她做訪問時我死黐住跟埋去的。嗱,唔好問點解。

做個在城市裡沒記認的人

我睇過兩次《跟蹤》,一次是2007年上映時,一次是寫呢篇文的前一個晚上。
第二次睇的時候,好病,食咗藥頭暈暈好想瞓鼻又塞,但依然好專心地睇晒,過程中完全不含fast forward或跳chapter成份,真的是由頭睇到尾,甚至連最後的credit都撈埋。好奇妙。
這是游乃海首部執導作品。作為一個新導演的首作,有很多配套可以幫到件事,例如演員——如果有資深演員助陣,無疑可減低「新導演首作」這標籤通常所附加的稚嫩味。
咁當然,也視乎導演本人是否恰當地用到那班資深演員。
梁家輝——個人問題,我不是梁家輝粉絲,即不是他所有戲我都會衝去睇(奇妙在我第一部睇的梁家輝孭重飛電影是《垂簾聽政》),但有佢份做的戲我通常都有睇。梁家輝給我感覺是既可收得好埋,也可張得好揚,《跟蹤》拿取了他這種特性:本質上他是一個窮凶極惡的悍匪,但基於實際考慮他必需時刻隱藏自己,路過見到CCTV會擰歪面,搭叮叮俾錢時只會入散銀。但他的「凶」,在關鍵時刻會一嘢爆出來,而每一嘢爆都必定是兇到極點。爆完,再次妥貼地收埋,演回一個在城市裡沒記認、不留下半絲痕跡的人。
任達華——個人問題,我不是任達華粉絲,即不是他所有戲我都會衝去睇,但有佢份做的90年代三級片或奇案片我通常都有睇(個人首選,《賊王》!)。曾幾何時的任達華,配合佢嗰個吹得好誇的髮型,在銀幕上不是張揚的心理異常者,就是張揚的舞男。但後來,收歛了。在《PTU》是個不苟言笑粒聲唔出的PTU,在《黑社會》是個明明前一秒仲對住你笑下一秒就抬起舊石置你於死地的黑社會。《跟蹤》是他把自己更進一步地收埋。作為狗仔隊阿頭,就算是因為他和同僚提供的情報而拉到大賊,press con上也不會見到他。這是職業和身份所賦予的屬性。

這是梁家輝和任達華的對決
只是中間攝了一個(由現實到虛構都是)菜鳥,徐子珊的豬女。
現實中的她,當年當尚算新人,菜鳥;虛構裡的她,啱啱加入狗仔隊,菜鳥。
電影明明可以名正言順齋拍梁家輝和任達華的跟蹤 / 反跟蹤式對決,多一個徐子珊唔多,少一個徐子珊唔少;這名菜鳥的存在,或許也是首度拍戲的游乃海的一個自我投射——這就是菜鳥對某個未知領域的一次鑽探。如果這真是一場個人心理投射,游乃海也在展示一種內歛修為,不像某些新導演,每一刻都在張揚地嘔啲嘢你睇。
1.《跟蹤》有槍戰,但問心,統統不算好看;真正好看反而是那些在城市裡的等待、死跟、窮追、碰上——等到目標,就死跟,跟跟吓被發現,就窮追,追到某一刻點知就突然遇上——惟有作出不露兵刃的正面交鋒。
2.所以睇第二次時我竟然睇到了一份古龍小說味。梁家輝和任達華,兩個不曾碰面(但又注定碰面)的當世低調高手,勝負,就在頃刻之間完成。梁家輝贏的,是那一份很形而上的凶。
3.任達華有一個徒弟仔徐子珊,初涉江湖,過程中累積經驗值,由菜鳥進化成可以獨當一面;而她的獨當一面,既基於任達華這師父的循循善誘,也包括她本人的本質。是的,高手總是擁有成為高手的本質。
4.這江湖還有一大班配角:為食的林雪、爛口但工作認真的邵美琪(即使她每次爛口都好似為了爛口,有點突兀,咁喺一個嚴肅場合有人突然爆粗就係咁突兀啦)、管唔掂班細的匪徒甲吳廷燁(我好鍾意睇佢做戲)、懶有主見唔聽大佬支笛的匪徒乙黎耀祥——還有指揮中心裡的黃素歡,亞視出身的女演員。我連最後credit都撈埋,就是為了確定是否有佢做。
演技這回事,好深。或者咁講吧:當TBB只管安排一些需要時刻張揚到極點的角色,給徐子珊以及一眾小生花旦時,真正懂得演戲這回事的,是會適當地張揚地收埋。我真心希望徐子珊能有更深刻的演出(同樣,唔好問點解),而深刻演出不是那長長眼睫毛、七秒強姦、飛身逃離爆破現場,而是像那個好似冇嘢但又好有嘢的豬女。
(原文刊於am730)

6 則留言:

  1. 本身本人對徐子珊的印象, 只在於tbb的花旦--而且是有奸臣氣質的一位.
    然而, 某天在dvd店外看到不斷重播的《跟蹤》片段, 看到冷靜地慌張的徐子珊, 不得不為她的演出驚訝. 比其他初入行的演員, 她未免上手得太快了吧.

    一直希望再次看到她除了tbb浮誇以外的演出, 可惜不知她是怕了, 還是被怕了. 無緣得見. 可惜.

    回覆刪除
    回覆
    1. 無奈大部分tbb劇都要求小生花旦都要七情上面咁做戲,先代表有演技…

      刪除
  2. 當時我都都覺以一個新人黎講,跟蹤入面既徐子珊做得好好,但後來又諗可能個角色岩佢者,其實如果講好演技,好似你講咁,要能放能收,做咩角色都take care到而且最好就係唔覺做緊戲就好了,但新一輩黎講有邊個係咁?我暫時未諗到

    回覆刪除
  3. 黃智雯几似当年的陈松伶

    回覆刪除