大佬 Don’t Look Back in Anger la!

我迫自己去聽Noel Gallagher的《High Flying Birds》，嗚……嗚……
 
好在邊？
當我迫自己把這隻《High Flying Birds》聽到第五次時，我終於開始覺得，OK好聽喎。
弊在，今年2月聽Noel細佬Liam自己話事的那隊Beady Eye專輯時，聽第一次，已經覺得OK好聽——而我們都知道，Beady Eye不過是一隊冇咗Noel的Oasis而已。
但不論是大佬的solo作又或是細佬主理的新樂隊專輯，我都只認為OK好聽。奇在，外界對兩兄弟分拆後的獨立作品，都給予高度評價，尤其是大佬，直情好似唔敢得罪佢咁，有專業樂評人甚至讚到Noel這張《High Flying Birds》是他自《(What's the Story) Morning Glory?》以來，表現最好的專輯。
唔X係吖？

Oasis的一體兩面
《High Flying Birds》的OK好聽，跟Beady Eye《Different Gear,Still Speeding》的OK好聽，原因同樣是裡頭的歌根本就是最本格的Oasis，沒有任何變更，也沒有任何新嘗試——Beady Eye集中喚回Oasis早期那種最直接的興奮爽快，Noel則集中催谷Oasis中後期的深情意向。
如果把兩張專輯撈埋一齊並加以刪減，這根本就是一張極穩陣的Oasis專輯。
如果懶，唔想刪減，直接出一張double album，亦得。
寫歌方面，大佬自然是冇問題的，最大問題係佢把聲——大佬，我並不是話佢把聲唔得(我一直堅信《Don't Look Back in Anger》這首Oasis金曲，真的比較適合大佬去唱)，但一拍埋細佬度，又真係，差好多。所以，當我聽到《High Flying Birds》第4首的《The Death of You and Me》，聽到Noel又獻上他那獨門的深情假音時，真的令我打了一個冷震。
我終於明白，為甚麼要迫自己聽到第五次時，才開始覺得OK好聽了。過往聽Oasis的碟，即使也會聽到Noel的深情歌聲和假音示範，但十首歌裡頭頂晒槓兩首。兩首？OK，仲頂得住。頂足十首？唔係唔得，但要俾啲時間適應囉。
真正能夠為Noel的歌add value的，始終係佢嗰個死鬼細佬。

真的拆夥了
2009年，Noel突然宣布決定離開Oasis。原因是再也頂唔順個X街細佬。
當時聽到這消息，驚奇而不驚訝，兩兄弟基本上從未停止過表演鬧交和鬧翻，但始終背負著一門龐大音樂生意(Oasis從來都是屬於他們兩兄弟的樂隊，其他成員存在感很薄弱)，不會這麼容易拆夥吧。
Noel竟然是堅嬲。撇除其他積埋多年的怨懟，Noel這一次堅嬲的一個重要理由，是他不滿細佬要求在音樂會，順手大肆宣傳埋他的個人時裝品牌Pretty Green。
但Liam可沒有被大佬嚇窒，話咁快便宣布Oasis會run落去，絕對不會因為某一個人的離開而玩完——但到了最後，還是改用Beady Eye名義出碟，而冇再用Oasis個名。
兩年過去，兩兄弟分拆後的作品都先後面世了，評價毋疑是OK，實銷數字方面卻點都及不上兩兄弟還未反面的Oasis年代。
當連更加不可能復合的The Stone Roses，也可以攬頭攬頸宣告reunion時，我更加叫自己相信，Noel和Liam兩兄弟或者會在不日走番埋一齊……搵錢。我絕不介意的。