ROBOCAT 511

浪漫月巴睇90s（7）：子華一思考，人類就發笑

這夜，我又翻炒了一次《跟住去邊度》。黃子華90年代思想最深邃的一個棟篤笑。

1.當然你有權反對。

2.又或，你已經忘記了那個在90年代透過讓我們發笑而冒起、為了Keep住讓我們發笑而努力掙扎的黃子華。

3.首次欣賞黃子華演出，是1992年的《神算》，即（黃子華冇諗過係由）Leon做男主角嗰套。但Sorry，齣戲我其實覺得OK悶，悶不在故事，是許冠文的喜劇節奏在當年已有點不合時宜，而當年的Leon又擺明不是搞笑材料……結果我的目光只能放在方剛和黃子華——方剛，我向來熱愛他的奔放（其實是狂放）演出風格；黃子華呢，只覺得呢條友賤得嚟又幾好笑喎，根本不知道他是乜水，不知道他有份編劇，更加不知道他是因為《娛樂圈血肉史》而令許冠文主動搵佢……

4.第二次欣賞黃子華演出，是《棟篤笑雙打之玩無可玩》，即拍住張達明那一個——不是入場睇，而是透過TBB的失驚無神轉播剪輯版。記得當時的我一路睇一路笑，笑到拍晒手恍如癲咗嗰隻。

5.後來我添置了一部具有播放VCD功能的Desktop，除了用來播放各類型高級成人藝術動作電影，還有黃子華頭三個棟篤笑：《娛樂圈血肉史》、《色情家庭》、《跟住去邊度》。有個說法：任何創作人在第一個創作裡總是難免講自己，從個人經驗 / 歷出發，《娛樂圈血肉史》交代的便是黃子華的一段過去，一段好想做演員偏偏做唔到但又不願放棄的過去。明明很悲涼，卻被黃子華化成一連串自嘲，一連串好笑到極端殘忍的自嘲，我們笑得愈大聲，對作為當事人的他便愈殘忍。我認，就是這種自嘲的殘忍，令我深深愛上黃子華（當時讀了一點哲學，尤其愛那個「李小龍識功夫 + 讀哲學所以拍動作片，佢唔識功夫 + 讀哲學所以拍文藝片」的錯誤邏輯推演示範）。

6.至於《色情家庭》，我冇乜印象。對於《跟住去邊度》，我就好深印象——深印象在開波15分鐘全場只有零星笑聲，但當逐漸進入主題，觀眾開始由冷漠到勁笑——同而家好唔同，現在去睇黃子華棟篤笑，係預咗好笑，黃子華出場連嘢都未講只消轉個圈，全場已經笑咗先；當年去睇黃子華棟篤笑，係好奇，睇吓係咪真係咁好笑先？於是形成了一個笑的防護罩，想我笑？冇咁易。的確頗衰格，亦有點殘忍。

7.由個人奮鬥辛酸的殘忍自嘲到展示人生方向的深邃和虛無後，97，終於來到。《秋前算帳》，大陸收番香港前三個月，說「全港市民熱烈慶祝回歸」呢十個字，有八個字係呃人……同時陳述了一遍溫水煮蛙的預言，而我們只識笑，只覺得是一個玩笑……世紀末的《拾下拾下》，是黃子華給他本人和香港人的一次總結，原來我們活在香港這個經濟城市，作為經濟動物，所秉持的就只能是「搵食啫～犯法呀？我想㗎！？」的精神。

8.然後，不需要事隔多年，好多人已經身體力行去證明，證明他們為了搵食，可以變異成另一個人，一個令你咬牙切齒的人，畢竟令人咬牙切齒不屬違法。至於當中是否隱含了一種「我想㗎！？」的無奈？謎。

9.人類都係傾向麻木，唔只係香港人問題——基本上人類傾向於保護自己，咪麻木多啲囉，而香港呢個環境就更加需要去麻木，所謂嘅麻木，包括好多嘢，譬如良知、公義。某程度嘅麻木係生存嘅本能。——黃子華在97年某一集《鏗鏘集》訪問中咁講。原來我咁愛子華，是愛他的不麻木；因為他不麻木，對塵世間人和事的荒謬還有感覺，感覺不一定下下都要直筆甩地吶喊，喊出的大可以化成一個個玩笑，笑到你淚流不止。

10.黃子華的玩笑，由一開始就墊著一層悲。愈好笑愈悲涼，因為世間如此。
（原文刊於am730）

食到無窮Fat自多——自省對話錄

古語有云：吾日三省吾身。
黐線。現代人生活步伐急促，加上又要忙於食Buffet，省到半嘢已經難得。

但一年一省，還是可以。尤其一年將盡時，更加是自省的好時光，反問自己過去一年（冇）做過乜、多少快樂與哀愁，以及有幾多逆來順受。以下是一個「食到無窮Fat自多」的月巴佬自省過程。為求懶有趣味，本文將採用一種嶄新的精神分裂寫作手法，亦即自問自答。

月：最近忙乜？
巴：寫paper寫paper寫paper寫paper寫paper寫paper寫paper寫paper寫paper寫paper……
月：Well，其實你答一次便可以。感覺如何？
巴：好正好正好正好正好正好正好正好正好正真係好正總之就係好正！
月：寫paper需要睇好多書嗎？
巴：幾本總需要吧。畢竟能力所限，唔似得某啲人咁掂，我一日頂籠只能睇三十頁學術書籍……最衰寫paper唔准用雜誌作為參書考目，嘿，抵特首叫啲商家佬唔好捐錢俾大學。但如果班人真係咁聽話，又算不算是另一種形式的官商勾結？
月：OK……可以交代一下讀書的理由嗎？
巴：因為我唔叻。
月：點樣謂之叻？
巴：好似阿叻。但當我知道阿叻學歷不高時，我立即後悔，早知去報國力書院或傳說中的蘇文大學。
#########
月：好似問極都只在邊皮徘徊，不如轉問其他：2015你最難忘的一個人是？
巴：太多，過去一年實在太多出類拔萃到我難忘的人了，如果一定要講一個，盧寵茂。他的所作所為所言令我明白到，強如醫生，讀過咁多書，一樣會受傷，受傷時一樣渴望別人慰問，如果得不到預期的慰問，仲會識嬲，實在是一個性情中人。
月：性情中人是咁解的嗎？
巴：說到性情中人，其實我又何嘗不是？過去我會為自己爆粗而歉疚，現在不會了，冚家……
月：有沒有難忘的說話？
巴：官．到．無．求．膽．自．大！過去一年高官們都好大膽，大膽地用公帑，大膽地頻頻外訪。
#########
月：你似乎講來講去都是別人的事，但現在明明是進行自我反省。
巴：在這個官到無求膽自大的年頭再配合性情中人和容易受傷的醫生及阿叻諸如此類出類拔萃人士夾擊的情況下我依然食得屙得瞓得翻瞓亦得，我認為自己已經能人所不能。
月：感覺好逆來順受。
巴：有啲上一代人講，因為他們逆來順受，才能擁有今日成就。
月：但你是嗰啲上一代嗎？嗰啲上一代同你有親嗎？嗰啲上一代有So過你嗎？
巴：嗰啲上一代有獅子山精神嘛……
月：獅子山只是一座咁啱望落狀似Lion的山，但無論似乜，都只是一座山，山只是山，甚麼精神都只是嗰啲上一代人加落去；精神再慢慢凝固成一個規訓式緊箍咒，箍實你呢一代、下一代、下下一代，直到永遠。
#########
巴：嗚嗚……咁哪一天我們會飛？
月：不如問哪一天佢哋先捨得死。
巴：而偏偏佢哋的人生超級續航。
月：一聽到呢四粒字即刻想高歌一曲今天我……
巴：Hey唔該你咪再唱。年尾流流我唔想發火。
月：最後一條：你交咗稅未？
巴：頂頂頂頂頂！今天我……預祝大家新年快樂。
（原文刊於am730）

ROBOCAT 510

浪漫月巴睇90s（6）：90年代後半OK很美，只因有妳。

估不到，事隔多年後，我會再次狂聽Kelly的歌。事情是這樣開始的……

1.冬至夜，要開夜。同事F跟我說：聽晚我去睇Kelly演唱會喎——同一時間同事B也說：咦我又係聽晚睇喎。而我只能說一聲：哦。

2.同事F & B先後收工。我需要留多陣。突然心血來潮，想上YouTube搵一隻歌聽，一隻我N年冇聽但十幾年前成日聽和唱的歌：Kelly的《懦弱》。

3.Wow，原來真係有，而且有兩個版本，一個是TBB自家製MV版，一個是用《天涯海角》電影片段剪輯而成的卡拉OK版（但由到尾都見唔到金城武個樣），「從沒有勇氣，人獨個地飛，害怕被放棄，被置之不理。我懦弱地挽留你……」Well，我兩個都睇 / 聽晒，而思緒，恍如返番去十幾年前……

4.1996年。我讀緊Year 3。即使那一年要籌備畢業論文，但有排都未畢業，使乜咁急籌備呢……加上少堂，（又冇拖拍，單拖的）空閒時間特別多，那時候最鍾意去沙田娛樂城睇番齣Movie，貪易買飛（其實當年好多戲院都好易買飛）。

5.《天涯海角》上映第二周。晏晝兩點半場，全場加埋帶位得四個人。事前我唔覺意在某報睇過篇影評，《天涯海角》被某著名影評人狠插，話裡頭充滿政治式獻媚，結果評分只得，四分，十分滿分。

6.我就是抱住這個先入為主的「四分觀感」入場。散場一刻我耷低著頭，我不想別人望見我似乎（想喊但強忍著淚不過又真係）喊過喎的模樣。問心，我也不清楚是邊一Part觸動了我，但當望住他們仨站在天涯海角，自命硬漢的我已經好想大喊……

7.投入，其實同我當時身分有關——我是Kelly Fans。由1995年仲夏、在漫畫舖做暑期工時偶然聽到她的《一切很美 只因有你》已經立即舉手成為Fans。事實是，當年的Kelly明明初出道，但感覺已經唔似初出道（反而今時今日不少唱咗五、六年的現役歌手感覺還只是個新人）——當然，她有著一股新人才有的清新，但同時又有著一份壓場感；總之在我眼中，她一出道就已經好紅，好離譜地紅；新人必經的那些磨難挫折，Kelly都似乎不曾遇上過——而更離譜是，好多新人王到了入行第三、四年遇上的樽頸位，她亦好似免疫……（回看跟她同年出道的樂壇新人，大部分都消失風雨中，除了陳曉東鍾漢良）

8.買齊Kelly碟 / 睇勻Kelly戲 / 唱K必點Kelly金曲來睇（還有張學友《離開以後》，卡拉OK版MV有Kelly演出），對一個Fans來講，責無旁貸，而在我這麼一個小小小Fans眼中，Kelly外型實在賦予了她太多可能性：她固然靚，靚得不庸俗，仲OK有性格；而呢份性格，令她同時有型，你不妨睇番黃耀明《春光乍洩》MV，即使只是用搖晃鏡頭拍著裝扮完全一樣的明哥和Kelly，在一個禁閉空間Keep住行嚟行去企吓坐吓，但就是有型。在那年頭，任何新人（不論男女）都只會 / 能用一個（被包裝的）形象拋入市場，唯獨Kelly，由可愛到野蠻到懦弱到性感到有型，玩晒。咁多年來，再沒有出現過這麼一個樂壇新人。

9.而因為Kelly，我們同時認識了雷頌德（仲有Dry……）。我承認他寫的某些歌是好聽的，像《懦弱》，我鍾意到當年在K場不知唱了多少次；仲未計《醉迷情人》、《風花雪》等……

10.Kelly填充了我的90年代後半。廿年後的今天，她已經帶兩個仔到紅館舞台上了。唉時間使唔使過得咁快唉。
（原文刊於am730）

續航力，比原力更神秘！

手機講究續航力，其實人也一樣。尤其在香港。

原力有乜用？
睇《星戰》，當睇見女主角原力覺醒，立即可以隔空呼喚光劍，同歹角格起劍來——超，有乜用？
我可以肯定，如果女主角活在香港，就算空有一身澎湃原力，也只是一個廢青。
因為她實在太有立場太疾惡如仇。就算歹角利誘她加盟到自己嗰一方，她也不為所動，實在太不識趣——在香港，不識趣，只會減低你的人生續航力。不識趣，等同罪。
但塵世間任何事都要付出代價，你希望你的人生（像家強般）超級續航？就要預咗作出犧牲……整件事太深奧，我決定援引一些成功地超級續航的現實例子，讓你更易明白。

超級續航人物代表
1.阿叻——大鑊，近幾篇文都情不自禁地提起他，證明他真的極具參考價值。對於佢話如果自己後生啲甚至做到facebook創辦人的言論，我絕不懷疑。畢竟他人到中年還夠膽外面著see-through裡面著泳褲示眾，仲有乜難倒佢？
2.性情中人——事實證明，只要閣下爆粗對象政治正確，是完全沒問題的，而且更可獲委任其他公職……冚家——嗱嗱嗱我即學即用，我也是性情中人。
3.吳克儉——民望如浮雲，支持率也只是數字，對官位絲毫無損，局長續航能力匪夷所思，好正！
4.王晶——Why佢可以屹立影壇咁多年、續航能力咁強勁？咪多得你同你繼續捧場囉。
5.「家駒」——這例子有點不同。家駒明明不在人世，卻是一位（剩餘價值）超級續航的樂壇傳奇，因為勝在求其搵個人笠件紅色褸就扮到，亦因為勝在家強一樣能夠照攬如儀——家強表情話俾我知，佢真係攬緊阿哥（即使冇人覺得係）。

超級續航下的一些異變
原力只能幫你call劍和格劍，續航力卻足以令一件事改變、變質，但冇所謂，續航力永遠是優先考慮，變唔變質？Who cares？
1.Beyond——這已經成為了一個令家強冇咁幸福的名字，難怪當他攬著那個「家駒」時，個樣好慘。
2.勁歌總選——搞了咁多年，已差唔多變成「星夢娛樂旗下歌手之夜」，即使依然以樂壇盛事包裝，盛事到在電視城錄影廠閉門進行，連頒獎嘉賓都冇，但有理由相信，依然會長搞落去……（註：三十年前的1985年，勁歌總選在紅館舉行，出席歌手包括張國榮梅艷芳張學友阿叻個friend等等，頒獎喜賓計有周潤發鍾楚紅黃霑等等）
3.Uber——曾經是創新的代名詞，如今，變成挑戰香港法治核心價值的代表。整個變化，唔使半年。
4.天災——已暗地裡變成人禍，但依然被包裝成天災。無論人禍定天災，都阻不了超級續航的發展。

Finally，How to提升續航力？
這一part，我只提供兩個名詞，請自行參透。
1.深圳——一個令香港自卑、如果香港做到一半已經很好的地方。
2.肥肉——食齋使人瘦，肥肉令人肥；想提升續航力？仲唔快啲去搶？
海濶天空下，May the 續航force be with you！
（原文刊於am730）

ROBOCAT 509