在1994至1995年那一年之間我睇咗《重慶森林》超過70次。
1.這大抵已不是叫做喜愛一齣電影，而是沉溺。好彩，冇受223影響，半罐（就快過期的）鳳梨罐頭都冇食過。
2.知道這齣戲是因為某一期《電影雙周刊》。1994年夏天，考完A-level靜候佳音（其實一點期望都沒有）的我，在柴灣工業區返暑期工。期望每朝早在地鐵站隔離商場食完一個唔使廿蚊的KFC早餐，就去鄰近報攤買本漫畫或雜誌，在開工前享用。就是某一天某一刻，買了某一期《電影雙周刊》，讀到《重慶森林》的介紹。
3.吸引我的不是王家衛，而是王菲。當時的我絕對是100%王菲Fans。記憶中，在TBB一個節目裡，她曾接受訪問說正拍緊一齣王家衛的戲，戲名是《旺角火宅之人》；我等了又等，等到冇晒聲氣，結果失驚無神殺出了這一齣《重慶森林》。
4.事實證明，如果《重慶森林》沒有了王菲，可能依然好睇，但肯定冇咁好睇。我唔理王菲係咪做緊自己，我只知道，一個（適合的）演員真的能夠為一齣戲Add Value。看著王菲在蘭桂坊那間快餐店邊聽《California Dreamin’》邊拎住樽茄汁與芥辣跳舞，偶遇663，再擅闖663屋企，用改變屋企布置來治癒失戀的663；這種單方面而又無條件的愛，突然被後知後覺的663發現，王菲卻淆起底來，又或，她覺得自己有需要去另一個地方，找尋另一個可能……
5.可以想像，若手上擁有王菲和梁朝偉，絕對可以拍一齣（所謂）靚人靚景的懶浪漫愛情片，偏偏阿菲與663的故事，卻是發生在中環蘭桂坊快餐店與半山行人電梯之間；不妨細心睇番，你根本睇唔到象徵中環價值的商業大廈。
6.Yes，我們一直被植入腦袋的中環，就只是一個商業中心，讓一群穿戴整齊亮麗的人搵大錢的商業中心，咁搵錢以外中環有冇人住呢？佢哋食乜呢？那裡的人文生活究竟係點嘅呢？Who cares？但那時候的王家衛，仲cares。
7.同樣是來自《電影雙周刊》的訪問。王家衛說他很喜歡看粵語長片的開場，總是拍下一幕幕香港風景，這些風景片段在多年後，唔覺意成為了一個個歷史紀錄。於是他拍《墮落天使》（一個原本出現在《重慶森林》的故事，但因篇幅有限，才分拆出來）也刻意去拍下一些香港風景。
8.所以我們在《重慶森林》看到以龍蛇混集馳名於世的重慶大廈、沒有被喜愛爛蒲呢類垃圾戲拍到惡俗的蘭桂坊、剛剛起好冇耐的半山行人電梯、中環結志街一帶的街市、啟德機場，以及一些曾經出現在香港但已經完完全全地消失了的舖頭（例如王菲買巨型加菲喵而林青霞咁啱企喺櫥窗度煲煙的玩具店）——Yes，我可以好大膽咁講，《重慶森林》是把香港拍得最靚的香港電影，那份靚，不是來自刻意去揀一啲所謂靚景又或地標去拍，而在於不加味精地拍下了上世紀90年代初的香港：有真實的人文生活、有烏煙瘴氣、有不整潔的喧囂街道、有夜䦨人靜的小街……以上共組成一個只．能．屬．於．香．港的Landscape，一個冇經旅發局加鹽加醋加入各種調味的獨有Landscape。
9.原來《重慶森林》真正不能缺少的未必是王菲，而是那個尖咀那個中環那一個香港，是那個實實在在的90年代初香港，為223和金髮女郎 & 663和阿菲的故事Add了無盡的Value（正如《的士司機》，你絕對忘不了那個70年代的紐約）。Why而家好多懶係雲集好多巨星的戲都唔好睇？因為不是搵一些冇意思靚景，就是搭個所謂靚景，然後將啲星塞晒入去做場大龍鳳就算，地域感完全被模糊和架空。
10.最後，希望屆時有份去王家衛講座的朋友可以代我問問王大導：幾時再喺香港拍戲？拍有香港實景的戲？
（原文刊於am730，20160226）
這才是真正愛護香港的表現吧？
回覆刪除