小時候，頭腦簡單的我，以為世界同樣簡單，以為土製菠蘿是菠蘿一個原汁原味的品種……
簡單生活，由早餐複雜選項開始……
經常聽人講：我過的是好簡單的生活。
真的咁簡單嗎？只要我們諗得仔細啲，所謂簡單，其實並不簡單。
例如早餐。又中式又西式，你叫我霎時間點揀？OK，吃西吧，又有A、B、C三個餐俾我選擇，火腿通定沙爹牛麵抑或雪菜肉絲米吖？Well，火腿通啦，咁配煎雙蛋定火腿蛋抑或腸仔炒蛋先？隻蛋要全熟定半生熟抑或太陽蛋？塊多士要牛油多士抑或改要蘿蔔糕？終於揀完了，但原來仲未諗飲乜——熱定凍？奶茶定檸茶？Oh No，早餐時間實在有限啊……
（所謂）簡單的生活，就由一個複雜的早餐選項開波。
食完早餐、轉完幾程複雜的車，返到公司，立即又要開展另一場複雜的辦公室戰役。邊個可以恰？邊個要保持烚熟狗頭？好複雜，複雜在程度上的拿捏——恰要恰得有個譜，狗頭又不能烚得太熟。
簡單地溝女，卻遇上複雜的步驟……
更複雜是當你在office遇上心儀的女同事。
即使月巴氏從不鼓勵大家在公司範圍內溝女，但，明嘅，當你每個禮拜已把大部分時間貢獻公司，實在難以再騰出時間出席其他社交場合，為了將溝女這回極度複雜的事變得精簡一點，惟有將就一點，在公司進行，將工作時間和溝女時間混合。
但只要你溝過女，便知道不論你的目標是女神抑或凡人，都是注定複雜的——當然，溝女神的複雜程度會高好多，因為必然遇上大量（比你優越的）競爭者。為求精簡啲，以下只以溝凡人作例子說明。
Firstly，你要識咗人先。唔識？How to 溝？而偏偏你同心儀的她份屬不同部門……嘩，複雜。
Secondly，總算識咗人嘞，但只是停留於hi-bye friend層次，如何「深化」（Why唔用「加深」？這又是另一個複雜的時代問題）雙方關係？嘩，仲複雜。
Thirdly，關係加深了，仲同佢（及一班麻煩同事）食過幾次lunch了，如何低調得來又高調地讓她明白你的心意？這裡涉及一場兩個腦袋間的攻防戰，而這場戰役通常唔可以打得太揚……好複雜呀！
OK，finally，（假設）你千辛萬苦溝到了，回首前塵你可能會問：Why溝女這件事上不可以精簡一點？直接乜乜咪得囉！（句子中的「乜乜」，請自行填充，這裡不提供標準答案）。
至於日後的求婚與擺酒，複雜到我都未試過，按下不表了。
精簡的超然示範
人生實在有限，實在不應該把所有時間統統浪費在複雜事情上——可以精簡的，便由得佢精簡吧。
所以苦心孤詣的張主任啊，實在不需要花費唇舌說甚麼特首具有超然於行政、立法、司法的地位，因為當一般人連面對公司樓下canteen三餸飯套餐都束手無策時，仲要佢哋明白甚麼是三權分立？行政、立法、司法各自代表啲乜？Wow，太複雜了。直接講「特首超然！」便精簡得多了。至於「超然」同「凌駕」有甚麼分別？Oh，這又是另一個複雜問題。
又所以，警方其實無需要苦心孤詣地刪改官網上有關「六七暴動」的部分字眼——直接成段delete咗去、當冇事發生過咪仲精簡仲慳版面囉。
精簡，可以是一種生活態度，也可以是一種務求令你不求甚解的掩眼法。
食早餐，今日揀錯A聽日可以揀番B；溝女，溝唔到A大可以改溝B——但歷史只發生過一次，再精簡，也不能偏離事實，要原汁原味。
會炸死人的土製菠蘿，絕不會變成香甜怡人的大樹菠蘿。
（原文刊於am730，20150916）
沒有留言:
發佈留言