2015年3月25日星期三

那夜我在大圍飲的不是啤酒而是哀愁





















這一篇,好私人。沒有甚麼大道理要講,也沒有甚麼小道理想講。

酒入肥腸愁更愁
酒,對我來說可有可無。我一年飲的啤酒份量大概是兩支;而啤酒以外的酒,仲少,一杯起兩杯止。
但早兩日,深夜,我主動捉了同事C陪我落bar——原本想嗌多個人,但如此深夜三人同行我怕被差人懷疑進行非法集會。
我去的bar在大圍,火車站附近、石屎球場(在遠古的年代我曾在這片石屎地上越過兩名球員單刀射入一粒)對面。Bar的名字是火車頭。這是我飲人生中第一啖酒的地方。
上星期失驚無神從網上得知一個消息:酒吧將在4月18日結業。我不是曾偉雄,決定親身落bar問個清楚,但由於太耐冇落bar,便捉了同事C壯膽。我倆各order了一支啤酒。好苦。
我問店方那結業消息堅定流?他答:堅的。我問:加租?他答:No,業主根本不續租,傾都費事。我問:之後會開乜?他答:唔知。
唯一肯定的是,4月18日晚上,便是bar的最後一夜。
然後我呷一啖啤酒,比先前更苦。

我曾經蒲過的大圍
自從搬了,已經好耐冇去大圍。
但回到三十年前,成為沙田友後,大圍曾經是我每個禮拜必去幾鑊的地方。
小學篇:周六,跟大人去積福街飲茶,飲茶期間偷偷哋去隔離機舖打機,五毫子一鋪(當時大圍還有另一間極出名的五毫子機舖,富利)。飲完茶,有時順便去附近某條巷的上海舖飛髮,離奇在那條巷有間舖頭,地下賣日用品閣樓卻賣玩具。
中學篇:同隔離屋張太個仔楊太個仔去海福花園打機,打機後去隔離買炸雞髀食,食完再去埋對面馬路的模型舖睇模型。暑假,就去(100%刺激的)青龍水上樂園嬉水兼玩機動遊戲。單車公園?我只去過一次,我踩單車太屎。
大學篇:去積福街的影碟舖租(西洋情慾片)LD,去金禧花園商場的CD舖買碟(商場內有兩間CD舖),我的陳昇CD統統在那處買;又或約心儀女同學在商場內快餐店共晉早餐,然後搭乘早班火車返學……
火車頭則是某年暑假,同學帶我去的。
飲料往往是成長的象徵。飲慣柯華田好立克的你,唔知點解地突然會在某一天改嗌咖啡或茶;飲慣薑啤的我也在某一天突然意識到,是時候飲啖啤酒。於是,便由同學帶領下去了火車頭,飲了一支啤酒,半杯Black Russian。
後來我發現自己愛的始終是薑啤。自從大學時幫襯過幾次後,便冇再去。接近廿年冇再去。
重臨舊地,布置似乎變了(但我和同事C都不肯定,記憶太稀薄);也有不變的——那道木門那面磚牆(小學時經過很好奇:呢間究竟乜嘢嚟?)。
但不足一個月,一切終將消逝。

其實我只係想食燒賣
埋單後,塊面紅如關公的我與同事C異常肚餓好想食燒賣,想起大圍有檔飲夜茶的,於是在突如其來的季候風吹襲下,慢慢的走過去——咦,冇咗嘅?我們一度懷疑記錯地址,便走去對落一條街——都係冇。
係咪執咗?有冇大圍人可以話我知?
(原文刊於am730)

2 則留言:

  1. 飲夜茶的店鋪已變了麵包店,我也是最近去過才知道

    回覆刪除
    回覆
    1. yes,有住在大圍的朋友都話咗俾我知… :(
      反而隔籬的世運機舖屹立不倒~~

      刪除