2013年11月20日星期三

追憶強伯的事前事發與事後

我懷疑我有人群恐懼症,所以那些(扮)日本百貨公司的感謝祭咪搞我。望住那一大堆湧 / 衝 / 殺入去掃貨的人,我只會諗起《World War Z》裡的喪屍,最弊我又明明不是Brad Pitt。
但上周六還是克服恐懼山長水遠入咗去亞洲博覽館——只為追憶強伯。

事前——嘩好多人啊。

 正確一點說,是好多師奶和阿叔啊。
有些師奶和阿叔,擺明是夫婦(部分甜蜜如軟糖,部分黐到實像拖肥糖);有些,是聯群結隊鬧哄哄的;也有些,是「2師奶s + 1阿叔」的組合(我承認我有諗埋一邊);而陪我迫入會場的既不是師奶更加不是阿叔——本來約了好幾位青青少艾,但冇人騷我這個阿叔。超,好巴閉呀。

事發——我胡思又亂想

 Rundown是正路的。唯一不正路,是當初沒有事先張揚會來的陳慧嫻和倫永亮。
基於身旁是個吉位,我不需要去理會(本應坐喺隔籬的)青青少艾,以致有大量時間胡思亂想:
1.不知道幾位歌手在後台會講啲乜呢?閒話家常?相對無言?會感慨嗎?畢竟大家都共同創造過香港樂壇盛世,但事隔多年後,不少人都話香港樂壇已經玩完(就連香港本身都已經玩完)。
2.觀眾席上的師奶阿叔又有甚麼感想?畢竟他們都共同見證過香港樂壇盛世,而有理由相信,當晚入得嚟睇的大多數,都認識強伯這一個人,強伯不少歌詞都應該 入晒他們的心——OK就算從來都冇去理會那些金曲是由誰填詞,但子祥美君慧嫻憶蓮學友的歌,一定影響過、甚或「支配」過他們。
3.而我最想知是坐喺前面嗰條後生茂里,你成晚表現到周身唔聚財咁究竟乜事?急屎?但你又好冷靜咁玩電話喎。而因為你keep住郁身郁勢,我就要跟隨住你亂中有序的郁身郁勢,郁埋一份,否則我根本睇唔到台上的美君和慧嫻——她們的確比較細粒嘛。
4.最「有趣」(我不知道用甚麼形容詞較貼切)一刻是,當輪到某極著名填詞人分享他對強伯的回憶和感想時,坐我身後的師奶跟她朋友說:「咦佢講嘢吖咁可以 去廁所lu。」我即時想到的是:A.佢忍咗好耐(入場前望見女廁的人龍,不禁有種慶幸自己是男人的微妙感覺);B.佢認為去廁所比起聽這位填詞人的感性分 享重要;C.這位填詞人,她不(懂得)欣賞。於是接下來的大半場我都好留意這位忠誠地表達自己的師奶,但我聽到的(咁佢坐我後面,唔通我成日擰轉頭望人 咩)只是——她的低泣聲。低泣得最猛烈是林憶蓮的《哭》。
相對那位填詞人的發言只能刺激她的膀胱,強伯的詞事隔多年,依然刺激著她的淚腺。
而從座位相隔了一行的後生茂里和師奶的表現,或許反映了香港樂壇受眾真的存在一個好闊的斷層。

事後——如果阿叻象徵了……

 好多師奶和阿叔一齊迫去機鐵站啊。
回程,我拆開那本入場前買的《洋蔥頭背後的林振強》,即睇。凌晨兩點半睇完。
書是洋蔥嫂為老公寫的回憶錄,除了睇到大量強伯軼事和超級珍貴圖片,最重要是看到一個香港人的成長和奮鬥。
那是還信奉獅子山下精神的年代。一個不是出生於大富大貴家庭的少年,由青春期反叛到出外留學,返回成長地做打工仔,開始填詞再到成名,然後被工作上的無聊 人事磨蝕、失意,到看清生活本質;他的成長他的歌詞,是香港由70s經濟起飛到80s快樂(而不乏暗湧)年代的,又喊又笑真實紀錄。
如果阿叻象徵了一種被世俗認為是香港人的成功典範,強伯則體現了另一種我們曾幾何時信守的價值,偏偏這種價值已經淪為不合時宜,和戇居。
強伯填的《蚌的啟示》,是叫我們不要將耳目收藏,而應去多聽多望;今時今日《同舟之情》,只會話你經歷過迷惘,其實不必以敵人自居(但敵我矛盾是由誰製造?),唔該攜手走過崎嶇(崎嶇又係邊個整出嚟先?)。
追憶林振強,其實是追憶一種喪失了的價值。

10 則留言:

  1. 月巴,
    會唔會寫飢餓遊戲第二集影評?
    佢唔用番第一集導演 搞到我有啲驚新嗰集唔夠上集好睇....

    回覆刪除
    回覆
    1. 我仲未睇啊…但為咗Jennifer我一定會睇~~

      刪除
    2. 齋睇
      咁寫唔寫先 ^^
      呢套你冇奶由唔寫兩版喎
      P.S. JL既戲真係有好大進步 點解我地香港自從林嘉欣之後
      只可以出啲XXBABY

      刪除
    3. 可惜
      宜加網上和報刊好少寫呢套戲

      刪除
    4. 咁奇怪,算係近期大作喎

      刪除
    5. AM730, APPLE 同埋評台各有一篇 但水平真係一般
      陰謀論黎講 我'凝'住冇咩人夠膽係香港呢個政治氣候為HG2 寫篇一針見血的評論
      當然有人咁寫 亦未必有人咁登

      刪除
    6. BTW 主場新聞都冇HG既文章
      我最期待的明報家明都唔見佢寫

      刪除
  2. 我有次星期六晚穿過新城市廣場時諗,如果我係喪屍就好啦,呢度大把嘢食……

    回覆刪除
    回覆
    1. 上周日我誤闖七田感謝祭(去完商務上返去2樓),嘩多人到!

      刪除