當月巴的我Keep住行快啲啦喂

自從二十年前在極度無奈情況下退出國術會，放棄了我最愛的蔡李佛後，我便同自己講：餘生不會再做任何劇烈或不劇烈的運動。嘿。

以不郁，應萬郁。

當然，二十年來我還是有踢過一次football，打過一次basketball和volleyball，但我只當作應酬，過程中絕不認真投入。像那唯一一次踢football，我故意自薦守籠，貪唔使交波唔使mark人唔使點郁；當敵隊把波踢到我守著的籠門時，我甚至沒有絲毫救波的意識與欲望……自此，朋友們再沒有邀請我去踢football。
我唯一稱得上真正劇烈的運動，是追巴士。巴士很得意，往往出現在一個你可望而不可即的距離，你可以選擇跑去追，但通常一跑到去，巴士司機便會化身成一個故意刁難你的教練，又或唔理市民感受的高官，把車駛走……自此我戒掉了追巴士。
懶理世界萬物都在郁，總之，我盡量保持唔郁——以不郁應萬郁。

終於體驗到自己的月巴

直至2015年1月某個周六午後。突然間，像撞了邪，找來全屋最sporty的衫褲與鞋襪（我有懷疑過別人會怎樣審視我呢一身似去買菜而多於做運動的sporty街坊裝，但事後發現其他人只會專心地跑，得鬼閒理你），去了屋企附近一條海濱長廊，急行。
急急腳行完頭100米的我已經極度後悔。
好辛苦。
汗從身上每一個毛孔湧出來。
全身肌肉都在嗌痛。
重災區是比別人月巴數倍的大髀和小腿……
而最大鑊是，我在地心吸力幫助下如實地感受到自己body的重量——我當然知道自己磅數知道自己屬於重磅類型人士，但講到尾，那只是一組抽象的數字，數字只是把閣下重量呈現、表達出來的符號，本身沒有重量。重量，需要你用身體去感受。
當日在海濱長廊的我，終於體驗到自己的月巴是相當的月巴。這個沉重發現，竟然激發了我、迫使我行 / 捱完那長達6,000米路程——即使事後我虛脫，我肚餓，我去咗食buffet。

不勉強自己但也不讓自己好過

離奇是一個禮拜後，我再一次以那身sporty買菜街坊裝，踏足長廊。辛苦依然，但又好似冇上一鑊咁辛苦喎……而重點是，第二次急行後，我冇再去食buffet。
往後幾個禮拜六我都有繼續急行，我有三個發現：
1.需要買對跑鞋——原本那一對只是去街用的，行到腳踭好辛苦。於是去運動舖，好認真地問店員：「Hey有冇邊款跑鞋適合我呢類人士急急腳行路使用？Thx！」店員聽後，遲疑了兩秒才答我（應該在嘗試理解我那條問題）。
2.我原來不適合邊聽歌邊急行——怕悶的我，最初的確聽住歌行，問題是，期間不時為了揀啱心水的歌而停下來，揀揀揀揀到心情煩躁！而有些歌，原來不太適合急行時收聽，像有一次天陰陰的，我懶有mood地故意聽一些慘歌，嘩搞到我好似急急腳行緊去死蔭幽谷……所以我不是聽Pet Shop Boys就是The Chemical Brothers，貪個電子beat配合我那跳脫步伐……到了最近幾次我已經冇再聽歌，心想，聽風的歌仲好（真正原因是我超大汗，汗keep住令earphone滑落，好鬼煩）。
3.不勉強自己。行到辛苦時，咪停一陣囉——但同時不讓自己好過，不能因為一念之辛苦，就拍拍籮柚折返屋企。

我漠視身體，身體在抗爭

唔經唔覺，keep住行咗四個月。絕對震驚了我。

從表象看，我當然還是完美地月巴，但我真的感受到，由第一鑊急行時那不可承受的重量，到現在竟然漸漸變得有點身輕如燕（的幻覺）。磅數呢？我不知道，反正由一開波決定急行已不是為了減月巴。月巴不月巴，我自細就睇得好開啦。
我只希望冇咁易攰。真的，過去一年幾，我好易攰——我明明不是從事勞動工作，工作只需要我坐定定，但坐定定，一樣好易攰，攰到連打機都覺得個手掣好heavy。
我估，或許是因為我長期唔願郁，令構成我身體的每一個部分都認為我唔再理佢哋，於是夾埋一齊，透過連串的攰向我反映、投訴，直至我終於肯回應佢哋，重視佢哋。我好似冇得到任何嘢，又好似明咗啲嘢，Yeah。
（原文刊於am730）