2016年2月17日星期三

浪漫月巴睇90s(12):我曾經和ATV有個約會
























獨我闖孤島不畏懼怕,掃盡惡魔警惕天下,信命數孤清從來沒怨話……

1.有時我唔知自己個腦點構造。一些明明好重要的,我轉瞬即忘;一些記嚟擺明冇用的,卻可以記一世。像《中華英雄》主題曲——而且是何.家.勁嗰首。

2.1990年,永遠估佢唔到的ATV宣布播映《中華英雄》電視劇,我既期待又不期待——期待ATV怎樣呈現這一本影響我超深的漫畫,不期待由何家勁飾演的華英雄。

3.只能說,我有點失望:A.只揀選了唔太吸引的火鳥島故事改編;B.程小東已經好落力,但要呈現原著裡華英雄莫測高深的武功始終相當勉強,勉強只能引致尷尬;C.何生個假髮唔知搞乜,經常隱藏唔到佢本人的烏黑頭髮……但我還是像撞邪般,定時定候由頭追到尾,追到連主題曲都識背。事隔多年後都識背。

4.我會這樣界定自己:我是ATV迷。小時候不明白ATV畫質比TBB差的原因,但無礙我投入ATV電視劇建構的另類Universe——這裡所說的另類,是相對於TBB的正路。唔知點解地,一直以來TBB劇的恩怨情仇就是給我好正路的感覺;而花旦,冇錯,係靚,但靚得都好正路囉……不像ATV,每個花旦都擁有不同型格,例如我最情迷的馬敏儀,有一種唔知點形容的另類味道。劇集仲癲,單舉一齣《大家姐》已經殺晒——成個世界真正話得事的人就是由黃莎莉飾演的「大家姐」,塵世間任何不公不仁不義之事,一概由她(及其手下)處理、仲裁、搞掂(嘩簡直無政府主義!)。

5.由於這個欄主要講90年代,太久遠的事,不贅了。總之,小時候ATV提供俾我的另類快樂,令我長大(少少)後,依然捧佢場(好好彩,我生於一個不會只睇TBB的家庭,屋企人都好支持我的取向)。90年代一開波,便為我帶來了一齣(感覺好鬼勉強何家勁個假髮又好鬼短的)《中華英雄》,永遠估佢唔到的ATV竟然唔知驚,拍埋前傳《中華傲訣》,描述原著最好睇嗰段:華英雄在唐人街的奮鬥歷程。再次估佢唔到,《中華傲訣》竟然是OK的(何家勁亦唔使再笠那個唔夠長的白假髮)。

6.那個十年,ATV還拍了好幾齣令我狂追的劇。《勝者為王》,食住賭片熱潮而拍,成功把本來只能在TBB專演閒角 / 奸角的陳庭威,變身成背負好多傷痛但又兼具俠義精神的有型賭王,成就了陳庭威首個事業高峰。當然,一個陳庭威不足以令我落搭,同劇仲有秦沛!楊群!(灌輸陳庭威做人最緊要有Power這個人生道理的)羅烈!以及張家輝!即使當時唔知佢乜水,但已覺得佢做戲OK好睇(後來他夥拍江華的《賭神秘岌》,更可窺見化骨龍的雛型)。

7.有關方面可能知我鍾意睇,(首創)在同一個周末,連隨把五集剪成一個精華版!

8.90年代ATV劇集的確帶挈一些男演員,像甄子丹——在未做詠春葉問前,便在ATV做過精武門陳真。問心,齣劇OK正、主題曲OK正(無可擋原是我精武英雄,英雄無不衝動~我竟然仲識得唱)、武打場面正(至於演技正不正?不在討論範圍之列)。還有尹天照,臨近世紀末,終於演出了(可能是他成世人唯一的)代表作《我和殭屍有個約會》。在香港電視界能不靠傳統恩怨情仇而以(擁有完整世界觀的)魔幻題材食糊的,應該僅此一齣。《我和殭屍》播出的1998年,我已投身傳媒行業,有關方面可能知我夜收工,特登在深夜立刻重播當晚的一集,嘩實在令我好鬼感動。當年的我,點會估到預視到「重播」竟然在廿幾年後成為亞視保持永恆死唔斷氣的秘技。

9.在慣性收視下,ATV曾經製作過不少成功劇集,成功到足以(在一段短時間)打低TBB,成功之道在於夠膽另闢蹊徑,人唔做我做,做到令人估佢唔到。估佢唔到,就是驚喜。那十年,給我驚喜的ATV劇還有《隔離差館有隻鬼》、《劍三十》(潘志文超型)、《槍神》、《馬場風雲》、《廣東十虎》等等……實在令人懷緬。

10.但事到如今我只想這齣鬧劇快點播完——但劇終前,唔該出埋糧俾人先。
(原文刊於am730)
(何家勁個假髮我尚可忍受,但鬼僕個Mask呢就…)

沒有留言:

發佈留言