大題中括號裡的那個「她」，自然是全智賢。
1.韓國娛樂發展史，應該分「《我的野蠻女友》前」和「《我的野蠻女友》後」。
2.在「《我的野蠻女友》前」時期，我對於韓國的印象就只有韓燒。讀高中時，沙田廣場地下面向沙田正街的地舖，開咗間韓國燒烤。我成日幫襯，幫襯店方的經濟實惠午市套餐，貪佢跟餐附送兩大碗白飯……Well，以上一段回憶同本文其實冇乜關係，我想說的只是，在那個有點遠古的無憂時光，點會諗到自己在日後會迷上韓國（嚴格來說是南韓）的女影星女歌星，同時又點會預料到香港娛樂竟然會有死到直的一天……
3.或許你同我一樣。我人生中第一齣入場觀看的韓片是《八月照相館》，第二齣才是《我的野蠻女友》。《八月照相館》的沈銀河，正呀！——她的正，太出塵，你不會 / 不能想像她是塵世間的一個真實存有。
4.不像全智賢，她的野蠻她的美，好真實，真實到你相信會在現實搵到個差唔多的女子——這個「差唔多」，是指個性，唔計樣。
5.全智賢靚嗎？靚，但又絕對不是靚到超凡入聖。如果要比較，金喜善呀宋慧喬呀李英愛呀可能比佢仲靚（曾幾何時，金喜善宋慧喬李英愛三位，構成了我們心目中韓國女星的核心印象），但她們三位的嗰種靚，太典型，好玉女，對得耐，會悶，反而不及唔典型的全智賢咁襟睇。（我們覺得）全智賢靚得唔典型，自然是多得《我的野蠻女友》。曾經飽受90年代玉女洗禮的我們（呢班男人），實在冇諗過野蠻原來是可愛的一種表現方式，也可以是掩飾傷痛的自欺欺人掩眼法；當我們（呢班男人）漸漸明白了，就變得像戇男車太鉉，由最初頂唔順到漸漸接受，再然後，瀨嘢嘞，不自覺愛上了。《我的野蠻女友》好睇，除了故事除了郭在容除了車太鉉，最主要原因講到尾始終是全智賢，她如實地給予了這角色說服力和吸引力（你試想像若換上金喜善去演？嘩，不敢想像……）。全智賢強在不單說服和吸引到男人，同時能夠令女性觀眾也不討厭她，甚至鍾意她，因為有共鳴（女人睇女人，從來都嚴格和嚴厲好多）。
6.那是2002年的事。千禧前後，不少院商在港發行韓國電影，我亦睇咗唔少（最難忘《快樂到死》的全度妍），但真正大獲全勝的只有《我的野蠻女友》。那時做緊報紙副刊，跟過一篇專題，原來唔少香港人因為實在太愛《我的野蠻女友》，搞到迷上南韓，決定去學韓文，坊間開始湧現教韓文的學校……我估無論郭在容車太鉉甚或全智賢本人，諗都冇諗過這麼一齣愛情片，竟然為自己國家進行了一次文化的對外征討。
7.有人話，全智賢所能提供的純屬本色演出——我認同，事實是日後不少同野蠻無關的演出都冇乜迴響，有些甚至釀成大災難（例如硬闖荷里活的《血戰新世紀》）……
8.咁講吧。塵世間有兩類女演員，一類是能夠改變自己、進入不同類型角色；而另一類，則需要為她度身訂造，再經由她本人獨具的特色與氣質，為那度身訂造的角色Add Value。全智賢，明顯屬於後一類。真的，有啲舉止和動作，佢去做，完全冇問題，一換轉其他人做，只會令你想打爆部電視（及當事人）。所以《盜賊門》那個陰陰濕濕又衰唔晒的性感女賊，好啱全智賢去演；《來自星星的你》的千頌伊，更是超啱全智賢去演——擁有著野蠻女友的原型，同時添加了一個紅星的奄尖聲悶和跋扈（全智賢在現實中早已體驗過作為紅星的滋味），但當拋開晒以上種種表面嘢，她始終是一個纖細而敏感、容易受傷的女人。
9.實不相瞞，當我睇見那個由全智賢拍的電話廣告，看著她用修長手指在智能手機上碌吓碌吓，真的有衝動為佢而換機……流行文化真的足以推動一個國家的各項發展。
10.寫全智賢的這個晚上，好多人在討論的娛樂新聞是另一個「賢」——謝賢。我不是說謝賢不能成為娛樂焦點，只是看出一種深層悲哀：今時今日香港真的再生產不了新的紅星——香港娛圈半死不活，而最野蠻的小丑統統在政界，天天提供惡俗娛樂。
（原文刊於am730）
沒有留言:
發佈留言