黃婉曼的高鼻尖下巴述說了...

近期最令我「震驚」的娛樂新聞，是黃婉曼被指整容。

 
整容像同性戀般在某些牧師心中等同吸毒和賭癮嗎？
我咁「震驚」，全基於兩點：
1.黃婉曼被指整容好大件事咩？這一點關乎當事人的知名度，以及當事人在我心中所佔的位置；
2.黃婉曼就算真係整容就好大件事咩？這一點關乎「整容」這行為的嚴重性。
首先，利申：我絕少機會能夠在天氣報告的時段安坐家中，所以，當黃婉曼還是天氣女郎，開始因「跳出香港」而跳上娛樂版時，我完全唔知佢係乜水，亦不知道「跳出香港」這句話有幾大passion。
直至後來才明白，「跳出香港」這句話是必須配合埋說話者的外形來一併「閱讀」的，well，我終於知道黃婉曼紅的原因了。
冇錯，作為一個血氣方剛的男兒漢，固然偏向鍾愛爆烈級身材，卻絕不是所有爆烈級身材都可以吸引到我，而咁啱，黃婉曼的(靚)樣並不是自己喜歡的類型，於是，我沒有成為其粉絲，沒有為每晚準時追看天氣報告而曠工。到後來冇撈天氣女郎了，去了另一間電視台做主持，有時仲會性感示人(在我編寫的辭典裡，性感就是少布，絕不是甚麼訴諸感覺咁虛無和虛偽)，但我依然是冷眼旁觀，那份冷靜和冷漠，連自己都嚇親。
所以當某天的娛樂頭條竟然就她的疑似整容大肆報道時，我震驚地在心裡問：嘩，原來佢依家咁紅嘞……真的嗎？
OK，就當我無知吧，就當今時今日黃婉曼已經好紅好紅，但整容——而且仲係疑似吖，又有幾嚴重？整容犯法嗎？ 整容有傷風化嗎？整容會像同性戀般在某些牧師心中等同吸毒和賭癮嗎？——不會吧。
頂籠，只能說，整容是欺騙。如果因整容，成功換來工作上的機會和方便而得益，就是欺詐行為。
簡單來說，即是講大話。
任何人講了大話，都不願坦承自己講了大話。
  
大前提是呃自己
我是有認真考慮過整容的。
自己知自己事。我個鼻生得核突(其實嚴格來說眼耳口都OK核突，只是鼻的表現寧舍突出)，扁而不高兼不挺，實在好想找一位名醫把它執高啲。
心理關口是：我成個樣現有的matching其實已經唔掂，齋整高個鼻，會否把自己由「樣衰類型A」，突變成「樣衰類型B」？由一種樣衰變成另一種樣衰，講到尾，還是樣衰——而畢竟已活在這塵世三十幾個年頭，身邊不少人已經用上幾廿年來接納「樣衰類型A」下的我，一旦變成了「樣衰類型B」，人家豈不是要從頭開始適應過接納過？
假設有一天我真的整了容，朋友眼利一嘢便睇出：「月巴你整……高咗個鼻？」
我(不好意思)：「冇吖，我成日用隻手推高佢咋嘛！推咗成三十年啦！」
朋友：「妖，整咗就認啦好心。但我不明白，點解整咗都仲咁醜？」
我：「……」
朋友：「呃乜鬼人吖？呃到人呃唔到自己！你天生樣衰，你自己最清楚吧。」
但我一直誤以為：呃別人困難，呃自己最易。整容的大前提就是讓自己自我感覺良好……

有些整容是冇樣睇的
欺騙的可接納範圍和程度，隨著時代轉變。
Nothing is real，我只信當下一刻的表象，不論你有冇整，只要讓我看在眼裡覺得靚就是了。
像一些被指整容的女星，看看她們那被翻舊帳時登出的陳年舊照，是醜的；(疑似整咗容的)現在呢，well，好咗囉，但好咗，不等同於靚囉。
真的，在這個(再不講原則的)年代，外觀上的整容極度平常，因為人人都有追尋(自以為)極致地美的自由。
但還是有一種整容我接受不來。例如那些失驚無神申請做副局長而曾經打著民主旗號的人士。
思想上的整容，冇樣睇，也最陰濕。我真的有種完美地被欺騙的感覺。