2014年5月7日星期三

分身啊分身,你改變了我的人生


































因為《雙生靈》這麼一齣場次奇少、乏人問津的日本片,令我對「分身」展開了一場思考,既深邃又嚴肅。

《神奇小子》令我迷上「分身」

藤子.F.不二雄給《神奇小子》一個奇怪設定:被選中成為神奇小子的成員,都會同時獲派一隻人形公仔。主角德仔,只要按一按人形公仔個鼻,人形公仔便會變成「德仔」,成為德仔分身;當德仔變成神奇小子進行任務期間,「德仔」則繼續德仔的日常生活掩人耳目。
其實即使沒有這設定,也不會影響《神奇小子》故事架構,但正因為這個附加設定,為故事add咗value:德仔平日OK懶,所以在冇mission但有homework的時候,也會撳「德仔」出來,幫自己做功課(「德仔」個性被設定為勤力乖小孩)。
幫手做功課外,德仔有時還會撳「德仔」出來同自己傾偈——進行真正的自己同自己對話。
成件事,非常哲學。

當「月巴氏」代替月巴氏返工
小時候我好恨有呢隻人形公仔,事隔多年牛高馬大了,我更加恨有呢隻人形公仔——有了它,我便可以在(只是公假而不是勞工假)的佛誕,撳隻「月巴氏」出嚟,代我去返工,而我就入長洲睇飄色,又或乾脆hea在家翻炒《一蚊雞保鑣》。有了分身,再沒有分身不暇這回事。
咦唔係喎,既然有咗「月巴氏」,我大可日日放假,等「月巴氏」返工賺錢供養;不用再開夜也不用面對日常諸種人事問題的我,則可以真正的靜下來,自閉家中寫自己想寫的嘢,唔使驚唔夠時間。有了「月巴氏」,一段時間double使用,實在令人鼓舞。
咦唔係喎,既然「月巴氏」只是機械人,唔會疲累唔使瞓覺,一於等佢放完工後返到屋企,幫我寫埋其他嘢,咁我就真真正正唔使do,享受人生。
但人就係咁衰。當你唔使do時,你又會無端端好想客串do番吓。於是某一天心血來潮,我決定讓「月巴氏」day off,俾自己返一日工。
返到公司才發現,「月巴氏」實在太強橫了,竟然把上司交帶落的工作完美地KO,而且仲升埋職……
我一邊享受著這份不勞而獲的快感一邊諗:「月巴氏」把我這個真正月巴氏平日做唔到的事,統統做晒——那麼,是我本人太冇用,還是「我」本人太有用?
但我心知肚明,這麼筍的事一定不會發生在我身上,更有可能發生的情況應該是:「我」承繼了我的蠢和懶以及不知所謂,再變本加厲,在公司表現奇差,被炒,以致我連份工都冇埋。
以上兩種情況其實一樣:「我」的行為把世人對我的認知改變了,而一切明明唔係我做,唔關我事。
結果無論係點,我留喺世上純屬獻世,我的存在只是一場蝦碌。

將蝦碌卸俾分身,把權位留給自身
以上正是《雙生靈》主題。不要被海報欺騙,這齣絕對不是甚麼驚嚇鬼片,反而是一場布局超精細的懸疑感性推理;近乎全文戲,望落似乎好悶,但劇情愈發展下去便愈勁,到最後甚至勁到透出無盡空虛。如果你選擇入戲院捧場,切勿遲(好多)入場,更加切勿中途去廁所,同時不妨留意以下幾點:
1.女主角家門外地下那灘水;2.進行那幾次神秘聚會的房間布置;3.長期用頸巾圍住下巴的高中生首次出現的地點——又或者,乜都唔理,盡情把自己投入那個無盡空虛的世界。
諗諗下,還是沒有分身好啲。否則,張炳良回應委任李焯芬擔任調查小組主席時就可以咁講:我唔知點解「我」會出咗咁嘅蝦碌嘻嘻。高鐵延期賴地硬,委任錯人可以賴分身,總之永遠冇人需要孭鑊。
但即使現實中冇分身俾你推卸責任,也不見得有邊位需要孭鑊,實在令人驚訝。
(原文刊於am730)

2 則留言:

  1. 睇完呢篇文,我上個禮拜六就走咗去 The One 睇早場﹝因為淨係得早場﹞。齣戲好正,前段好迷離,後段既迷離又緊張,仲有d估佢唔到。總括來講,係值回票價。
    不過始終唔明,主體死咗,分身係唔係都會即死?
    師奶既分身在鬧市插死主體,係唔係等同自殺?

    回覆刪除
    回覆
    1. er......其實應該係等同自殺,但我又冇認真考究……我睇戲時其實好粗心大意 :P

      刪除