2013年7月18日星期四

考試是個筲箕,也是一道牆





























我是一個超級極度嚴重害怕考試的人——講多次:我是一個超級極度嚴重害怕考試的人。

噩夢是,考考吓試攪長沙

最慘是,到而家幾十歲人都仲會發埋啲考試夢,而且必然是嚇到瀨屎的噩夢(嚇到瀨屎只是比喻)。
1.貼咗的題目完美地冇出,冇貼的卻完美地出晒;
2.去錯試場(現實中有發生過!);
3.帶咗好多支筆但支支都寫唔出;
4.考考吓肚屙……
這類夢,往往是會令我嚇到紮醒的,好彩是紮醒後才驚覺:剛才只是一場夢。Yeah……

那一個曾經接近完美摧毀了我的F
回看,我算是有考試運的人,但再有運也總有閃失,或用盡的時刻。
我中五會考美術一科的成績是:F。這個F很奇妙。
當年會考的成績分級是由A至F,以及U(unqualified)。U,大概是連分都俾唔落吧;而F,則似乎是:OK啦分數是俾到的,但又不足以合格囉。我不知道這是「勉強性鼓勵」,還是「恥辱式安慰」。
我那間中學的高中並沒有美術一科,想考,就要先得到相關學科老師保薦,咁當時美術Miss同我OK熟,亦知我極度熱愛畫嘢,於是咪保薦我,結果咪……(至今依然不知道那個F有沒有令Miss難做,但也想借呢度向她講聲sorry。)
這個奇妙的F,的確徹底改變了我。我曾經以畫家/漫畫家作為一生志願,每個周六日如果不是躝了出街,就一定是匿喺屋企練畫,有時候更會參加畫室搞的郊外寫生團(嘩寫生,很浪漫的一件事)。因為這個F,我知道自己在繪畫路上原來已去到行人止步階段,於是把心一橫,把畫筆整斷(這又是一個比喻)。
但這個F真的足以摧毀一切嗎?我的答案是:在那一刻,絕對係;但在往後悠長日子,這個F頂籠只成為一個讓我挖苦自己取笑吓自己的符號。而這不是甚麼風涼話。

我認為文憑試超難
讀書年代最憎兩類分享:1.狀元分享;2.會考失敗事業成功人士分享。
狀元分享:他們往往講到平時冇乜點讀書,但就(唔知點解而又好理所當然地)考到9A或10A。我總覺狀元們在寸緊(平時同樣冇乜點讀書的)我。
會考失敗事業成功人士分享:簡單講,咪風涼話囉。
如果要既不是狀元更加不是事業成功人士的我分享,只能說:好彩我出世早,不需要面對現在那個甚麼文憑試——當人哋只管話以前考公開試入大學難好多,我卻認為現在那奇形怪狀的文憑試隨時更難,難在奇形怪狀:所以很奇怪其中一名狀元明明自爆通識一科秘訣全在讀報,從多角度分析時事,但博覽群報的她竟然對「佔中」表示不便評論,因為不了解詳情喎——唔通佢抽起晒有關「佔中」的報道唔睇?這就是通識科的奇形怪狀。
自古至今考試都是一個(由權力人士製作的)筲箕,篩走一些人,留低一啲人,把人分類,有啲繼續讀上去,有啲就離開學校投入社會以不同方式把人生演繹落去。
考試也可以是一道牆,有些人話咁易就跨過去,也有些永遠都跨不過。但跨不過,又點先?邊個能保證牆後的風景必然更好?

沒有留言:

發佈留言