浪漫月巴睇舊戲（十九）：睇《生死綫》睇到想打爆電視

她是郭慧坤，全靠佢，支持我睇晒成齣戲。

友人B知道我是血殺片粉絲，多年來keep住勸我不得不睇《生死綫》，而我只是回應佢「得嘞得嘞」……朋友見勸極我都唔睇，索性買埋DVD俾我。

唔好問點解，我就是憎岑生。 

友人B好意，我心領了。問題是：我．超．級．憎．岑．建．勳。

先旨聲明，我當然唔識岑生，岑生更加唔會識我，我對佢的憎，是很直覺很神秘的那種——就像C9-A有權話「我好憎楊怡」，C9-B亦有權話「我超憎羅仲謙囉」，但問兩位憎的原因？通常都答唔出有甚麼特別原因的。而塵世間有一種憎，是真的講不出理由。

但，OK，你是絕對有權話我份人太C9的。

撇除岑生，其實幾好睇。 

總之，友人B送贈的《生死綫》終於被我完美開封，仲成功睇埋。我承認，這部由梁普智執導的1985年港產片，是有幾點吸引到我。

1.港產片絕少出現這一類「荒山野嶺困獸鬥殘殺系」電影，這可能同我們生活模式有關——去郊外露營從來都不是港式假期生活的主流活動，我們的假期主要是消磨/費在市區（近年是商場）。最早一齣是《山狗》，余允抗借用了《The Last House on the Left》和《I Split on Your Grave》的套路，拍了一齣郊區野蠻人殘殺市區後生仔、最後由受害人家屬為報仇而以暴易暴的仿作，重點是殘忍（和對莊靜宜的剝削）。論殘忍度，《生死綫》絕對及不上《山狗》，梁普智反而強調了作為施虐者的三兄弟的精神面貌：他們都極度孝順，他們道德觀的扭曲完全來自阿媽陳立品，即使阿媽死咗，依然貫徹執行阿媽意志。這令我想起我最「喜愛」的《黑色星期五》：Jason殺人，無非因為母愛。

2.不殘忍不太暴力，離不開用斧頭劈吓、放蛇咬吓人（還有把海膽當成暗器掟落人哋身上……笑死），但三兄弟每次出場都依然令你心寒——陳龍演的大佬，力量型，不苟言笑，每次企喺度個身都會keep住郁吓郁吓（不知道這是演員自行加落去還是導演的設計）；二佬陳敬，典型鹹濕類，多嘢講，他的每一句對白都經過特別設計；細佬程守一，智能有問題，但他對愛的偏執令佢殺起人來零舍狠（梁普智還用上大量鬼片lighting去拍佢哋三位，用意明顯）。

3.作為被殘害的後生仔女，即使無可避免地做出大量低智和懶勁及送死的行為（咁始終要切合番年齡），但至少，交到戲，而各人個性，也透過各自的外型塑造成功交代：有得舖蠻勁的Rambo類型（他甚至學Rambo戴埋頭巾）、有自以為擅長講道理的斯文富二代類型、有由始至終都信賴老師的乖乖女學生類型……即使我近乎完全唔識佢哋（只認得區海倫和邵傳勇和黃斌），但會知道邊個打邊個，這一點比不少荷里活血殺片做得好。

4.在《黑色星期五》和《月光光心慌慌》的universe，死，是有樣睇的——有些角色一出場，你就預知佢必死；又例如某些角色類型（例如淫邪學生妹和大件頭校隊男生），都是被歧視、約定俗成地晨早被判了死刑的可憐人士。《生死綫》冇嚟呢一套，任何人死的機會均等。

最危險的一個人，是岑生。 

或許電影裡的悲劇是命中註定，但因岑生（自以為完全出於好意）的做法的能度，令信賴晒佢的學生們，不知道殺機原來早就迫到埋身，而還以為冇事發生，以為那三兄弟不過是尋常島民。而岑生本人，帶學生到東平洲原來不過是想乘機搵番自己的青春私回憶（期間為了影日出更擅自離開學生，而他當時明明已經feel到三兄弟有啲嘢）；到發現此情此景已經同自己記憶中的不相符，他竟然好似細路咁大發脾氣……嗰一刻，我好想打爆部電視。

年青人，請不要亂信或輕信大人——尤其望落道貌岸然成個翩翩君子、吓吓都好似為你著想嗰啲，更要提防。當任何事物以一種君子姿態在人前展示，他/她/它隨時係最不道德最偽善。

至於東平洲，其實相當值得去。有朋友啱啱去完那兒露營，原來仲望到星。是抬起頭望上天才看得見的星，是在市區絕跡了的星。