諗唔到寫乜諗唔到寫乜。要亂咁搵一套舊戲寫自然不難，但又想寫到一些同「現在」有關的來寫。在屋企摷摷摷，竟給我摷番《殺手．蝴蝶．夢》出來，興奮。
二人著草，一人幫拖，另加一人阻撓
但憤怒是，隻碟竟然壞鬼咗，睇到三分二左右便窒吓窒吓不能再play落去。
因為王家衛，譚家明近日又被摷番出來講——說譚是王的師父，直至王找譚幫手剪《東邪西毒》，譚剪好了，王又讓張叔平執一執，結果師徒合作關係告終。《東邪》剪接事件，過去譚家明在訪問中也曾提及；至於係咪師徒？關係又未去到嚴重，但在王家衛早期導演生涯，譚家明的確給予過指導。
像《旺角卡門》那場經典的劉華夜闖大牌檔劈友。這場戲，開機第一日便拍。王家衛猶豫著，遲遲找不到一個著眼點，譚家明跟他說：你就當面前係一條血路殺出去。
好的意見，不一定長篇大論或引經據典。譚家明就咁簡單一句，便促成了這一場確立王家衛電影風格的戲。
至於譚家明本人，在《旺角卡門》上映翌年完成了《殺手．蝴蝶．夢》，便冇再拍片，仲離開埋香港電影圈，直至2006年才再完成長片《父子》。
好多人話，《殺手．蝴蝶．夢》是《最後勝利》的一次重塑，同樣有著三角戀、落難情侶掙扎求存，分別是：《最後勝利》用上你難以想像的cast和配搭：徐克和曾志偉，而曾志偉仲係同李麗珍是一pair的。
《殺手．蝴蝶．夢》正路保險得多。(當年還有叫座力的)鍾鎮濤 + (80年代最悽怨的女演員)王祖賢 + (啱啱離開TBB的)梁朝偉。
主角是鍾鎮濤。因一單偶發事故，著草，離開了愛人王祖賢。若干年後他做了職業殺手，在一次mission中重遇王祖賢，感情欲斷難斷，決定帶王祖賢遠走高飛。
咁當然，冇咁易啦。最大障礙是Final Boss陳惠敏——王祖賢一早獻身做了惠敏哥的人(當日那單偶發事故便是由惠敏哥來擺平，由一個純情女子變成在江湖長袖善舞強顏歡笑的女人)。
梁朝偉是成件事關鍵。他是惠敏哥司機，暗戀王祖賢，當知道她和鍾鎮濤那段可歌可泣愛情故事，決定奮不顧身成全二人，幫自己暗戀的人跟其真正戀人著草。
最後，是一場激烈但同時貫徹譚家明美學風格的大型槍戰，沒有人不中槍，但我唔知道最後誰死誰傷誰走得甩——因為隻碟play唔到落去。即使曾經睇過，但又真係唔記得咗。
唔好睇的地方只有一點
《殺手．蝴蝶．夢》好睇，但又夾雜住一些唔好睇。
好睇1：由鵪鶉到勇武的梁朝偉。拍這部戲前他早就是當紅電視小生，但《殺手．蝴蝶．夢》為他安排的角色卻是下靶中的下靶，但為了成全女神心願，他付出了勇氣，為愛犠牲(犠牲只是對一個態度的形容，唔代表佢演的角色到最後真係死咗——事關我真係唔記得咗咯。
好睇2：王祖賢。她的淒怨所向披靡到令鐵漢如我也痛心起來。
好睇3：譚家明的美術和杜可風的攝影。當中不少構圖，根本就是一幅畫。
好睇4：就像《最後勝利》巧妙用了陳百強《深愛著你》，《殺手．蝴蝶．夢》也好叻地用上梅艷芳《裝飾的眼淚》，為成部戲add了無盡的value。
至於唔好睇，其實只得一點：鍾鎮濤。他由外到內都跟成部戲的調子對沖，以致佢拎起槍時，你不會覺得有型；到佢中槍嘞，你又會覺得合該如此……
這部戲令你明白到為愛犧牲、為信守的價值而奉獻是甚麼一回事。當然，如果你認為在議會內大大聲為特首/政府護航，便是在為愛犧牲為信守的價值而奉獻，咁，你應該發緊夢，唔該醒吓啦。
沒有留言:
發佈留言