2013年8月9日星期五

浪漫月巴睇舊戲(三十八):衝上雲霄前,Sam哥先去搵大頭怪嬰

















就當我無聊兼夾唔知驚吧。最鍾意怪力亂神嘢的我,在中大時經常揀深夜單拖去行傳說中的辮子路——結果不是鬼影都撞唔到隻,就是遇上令人眼冤的熱戀中癡男怨女……啋。

A碟已經恐怖,B碟再恐怖十倍

我鍾意睇吳鎮宇做戲。對比忘不了Zoe的情深Sam哥,更愛他在電影中那種近乎失去理性的躁底演出——唔知點解,即使好多時吳鎮宇的角色明明望落好冷靜,都總像有股情緒被強力壓制,將爆而未爆。
所以,由他去演鄭保瑞的戲其實好夾——鄭保瑞的作品同樣地,總有一股毀滅性的力量由始至終潛伏著。
我觀看的第一套鄭保瑞作品是《恐怖熱線之大頭怪嬰》。朋友強硬推介,話堅驚——超,當時心諗乜世上仲會有恐怖的港產片咩?結果瀨嘢了。記得十幾年前一個熱到爆標的夏夜,我開了冷氣,play《大頭怪嬰》的A碟(當時是睇VCD)——到了準備播B碟時,最怕熱的我竟然熄咗冷氣,而當時還未知道B碟原來比A碟恐怖十倍。

恐懼關鍵是,你自己諗到好驚……
大頭怪嬰是透過一位聽眾打電話到電台節目分享才熱傳起來。有關這則都市傳說的資料,上網會搵到大把;這裡單純講戲,不指涉現實事件。
1.由90年代到千禧,港產恐怖/驚慄片除了《陰陽路》或《七月十四》那種套路(既有鬼又有大量笑料),又有另一一種,嘗試起用社會上流行的都市傳說,像《夜半1點鐘》其中一part,便改編了當年那張據聞拍到「嘢」的快相。1999年還有一套《目露凶光》,好似有鬼但實質冇鬼(當年公映時有另一個「真的有鬼」版本,我就覺得太搵嚟搞了),撞邪只是掩眼法,由頭到尾都沒有所謂鬼出現。鄭保瑞在訪問中說他很喜歡林嶺東這部電影,或許這樣吧,《大頭怪嬰》大前提就是不把大頭怪嬰拍出來。在一切都要求明刀明槍的香港,這種做法相當破格——尤其對一位新晉導演來說。
2.《大頭怪嬰》成齣戲,就是交代一個找尋大頭怪嬰真相的過程。由一個聽眾的分享,到找出當年目擊者(的離奇遭遇),到主角的身邊人開始瀨嘢,再到最後深入傳說中的大頭怪嬰所在地——由頭到尾,我們都不知道各涉事者遭逢不幸的原因,是否真的同大頭怪嬰有關,背後又是否真的有鬼魂在作祟(嚴格來說大頭怪嬰本身不屬於鬼的範疇),一切都似乎可以搵到解釋,但諗真啲其實一切都沒有理據十足的原因。
3.負責追查的是吳鎮宇和何超儀。前者是電台節目監製,後者是來自美國的記者,同crew還有兩名負責攝製的鬼佬。何超儀(最初)象徵的是理性代表,吳鎮宇則是冇乜所謂嗰隻,有鬼冇鬼不是重點,最重要是把節目做好。
4.作為一部恐怖/驚慄片,這樣的人物設計其實已經足夠,但鄭保瑞還為吳鎮宇加了一段感情戲——他有一個做護士的同居女友周麗淇,已發展到近乎沒有愛情的地步(女的默默守候,男的不是漠視就是無緣無故發老脾),而鄭保瑞更增添了一個頗堪玩味的配置:男方一直不知道女友曾經墮胎。結果,晨早便喪失了一個實在BB的他,竟然一直在尋覓那虛無縹緲的大頭怪嬰——而這兩個小生命的共同點是,注定遭逢不幸。
5.但《大頭怪嬰》不是要同你玩感傷,重點由始至終都是要嚇人,嚇人方法則參考了1999年的《死亡習作》,用唔清唔楚的主觀鏡頭,讓你親歷其中參與成件事(何超儀角色的設置,以及在她身邊安插兩名cameraman,就是為了令這些主觀鏡頭合理化)。主觀鏡頭主要用在兩場戲:A.吳鎮宇陪同何超儀去一個荒廢倉庫找她神秘失蹤了的鬼佬拍檔,結果發現——WOW!呢場戲我前晚翻炒時,依然被嚇咗一嘢!B.Ending——戲本身有兩個ending,兩個ending其實都沒有為你解釋甚麼,同樣戛然而止,但恐懼,就在這種知啲唔知啲的情況下標晒出來。
6.而最勁是,由開場到兩個結局到播埋credit,鄭保瑞都.沒.有.把.大.頭.怪.嬰.拍.出.來。一般將隻鬼拍埋出來仲keep住出場的鬼片,製造恐懼方法是由外至內,擺到明童叟無欺;《大頭怪嬰》卻要你自行把恐懼由內在滋生,一切有關大頭怪嬰的恐怖想像都只從屬於閣下腦袋裡,而你的恐怖想像又可能跟我的不同,但總之人人都曉驚。那種對恐怖的陰濕渲染,今時今日好多人都在明刀明槍地做。

4 則留言:

  1. 多謝月巴氏講"大頭怪嬰"。希望閣下揾日講埋"熱血青年",同樣由鄭保瑞導演,同樣地嚇死我。

    回覆刪除
    回覆
    1. (細細聲:遺憾是我一直未睇《熱血青年》……聽完你咁講,儘快搵嚟睇!)

      刪除
  2. 熱血青年恐怖驚嚇過呢套好多。
    快d搵黎睇。

    另外鄭保瑞好鍾意搵周麗琪做主角
    有次睇番套百份百
    鄭保瑞著住件印左周麗琪個樣衫
    個下即刻笑左

    回覆刪除
    回覆
    1. 不過唔知點解地我真係從來都唔鍾意睇周麗淇~~

      刪除